Birew kelip túrtpese, qozǵamasa, yamasa, aytpasa, ózliginen kelip shıǵıp belgilengen wazıypasın atqarmaytuǵın nemquraydı insanlar aramızda elege shekem kóp eken.

Bunday adamlar tuwralı biz aldıńǵı maqalalarımızda da, anıq mısallar menen maǵlıwmatlar bergen edik. Endi 8 jıldan berli komunnallıq tólemi ushın ótkergen pulın, óziniń esap betine usı kúnge shekem ótkerte almay, sergizdan bolǵan insan tuwralı aytsaq ne deysiz!

– Tórtkúl rayonı Anxorlı MPJda jasaytuǵın puqara Q.Sultanov bunnan 8 jıl burın, yaǵnıy, 2010-jılı elektr togi ushın 113 mıń sum tólegen eken. Biraq, bul aqsha búgingi kúnge shekem onıń esap betine túsirilmey kelgen. Bunnan narazı bolǵan puqara Ózbekstan Tutınıwshılardıń huqıqların qorǵaw jámiyetleri Federaciyasınıń «Isenim telefonı»na múrájat etedi.

Usı múrájat ótken ayda Tórtkúl rayonlıq tutınıwshılardıń huqıqların qorǵaw jámiyeti tárepinen kórip shıǵılıp, 113 mıń sum aqshası Q.Sultanovtıń esap betine ótkerilip berildi,-deydi Qaraqalpaqstan Respublikası Tutınıwshılardıń huqıqların qorǵaw jámiyetleri Federaciyasınıń sektor baslıǵı D.Dáwletbaeva.

Bul baǵdardaǵı jumıslar nátiyjeli dawam etpekte.

Qaraqalpaqstan xabar agentligi.