Ózbekstan Respublikası Bántlik hám miynet qatnasıqları ministrliginde 2-aprel kúni Xalıqaralıq migraciya shólkemi (XMSh) bas direktorı Uilyam Sving basshılıǵındaǵı delegaciya menen ushırasıw bolıp ótti.
Onda, XMShtıń Oraylıq Aziya boyınsha aymaqlıq muwapıqlastırıwshısı Deyan Keserovich, Oraylıq Aziya boyınsha muwapıqlastırıwshı ofisiniń Ózbekstan menen baylanıslar boyınsha baǵdarlamalıq xızmetkeri S.Toshboev, Ózbekstan Respublikası Bas prokuraturası, Ishki isler ministrliginiń wákilleri qatnastı.
XMSh bas direktorı U.Sving Prezident Shavkat Mirziyoevtiń basshılıǵında ámelge asırılıp atırǵan reformalar dúnya kóleminde unamlı bahalanıp atırǵanın, sonıń ishinde, 26-27-mart kúnleri «Tınıshlıq procesinde, qáwipsizlik tarawında birge islesiw hám regionallıq sheriklik» temasında Awǵanstan boyınsha joqarı dárejedegi Tashkent xalıqaralıq konferenciyası tabıslı ótkenin atap ótti. Ózbekstannıń miynet migrantların qollap-quwatlaw hám adam sawdasına qarsı gúresiw boyınsha huqıqıy mexanizmlerdi ámelge asırıwǵa qaratılǵan tabıslı ayrıqsha atap ótilgen halda, 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasınıń orınlanıwı joqarı bahalandı.
Ushırasıwda migrantlarǵa járdem kórsetiw, migraciya aǵımın tártipke salıwdıń huqıqıy mexanizmlerin islep shıǵıw máseleleri boyınsha Ózbekstan menen XMSh arasındaǵı qatnasıqlar dodalandı. 2016-jıldan berli Ózbekstanda adam sawdasına hám ekstremizmge qarsı gúresiw tarawlarında qospa joybarlar ámelge asırılıp atırǵanı atap ótildi.
Ilajda elimizdiń XMShǵa qosılıw máselesi boyınsha pikir alısıldı. Atap ótilgenindey, Ózbekstan Respublikası usı xalıqaralıq shólkemniń aǵzası bolmaǵan halda, XMSh tárepinen ótkerilip atırǵan joybarlarda belsene qatnasıp kelmekte. XMShǵa aǵza bolıw elimizge shólkemge aǵza mámleketler menen kóp tárepleme hám eki tárepleme birge islesiw ushın keń potencialǵa iye bolıw imkaniyatın beredi.
XMSh bas direktorı búgingi kúnde usı abıroylı shólkemge aǵza bolıw boyınsha huqıqıy tiykar tayarlanıp atırǵanı haqqında xabardar etildi. Óz gezeginde, Uilyam Sving Ózbekstandı shólkemge qabıl etiw boyınsha hár tárepleme járdem etiwge tayar ekenin bildirdi.
XMSh delegaciyası, sonday-aq, elimizdiń bir qatar ministrliklerinde hám vedomstvolarında da sóylesiwler ótkerdi.
ÓzA