Usı jıldıń 25-mart sánesinde Berdaq atındaǵı Qaraqalpaq mámleketlik universitetinde ulıstıń ullı kúni, shıǵıs xalıqlarınıń jańa jıl bayramı, jasarıw hám jańalanıw áyyyamı – Nawrız ulıwma xalıqlıq bayram seyili hám tamashaları bolıp ótti.
Tábiyattıń oyanıw dáwiri hám kún menen túnniń teńlesken waqtı bolǵan ulıstıń ullı kúni universitettiń barlıq fakultetleriniń milliy taǵamlar, kiyim-kenshekler, ata-babalarımız paydalanǵan buyımlar, olardan miyras bolıp, atadan-balaǵa ótip kiyatırǵan úrp-ádet jáne dástúrler, milliy qosıq hám ayaq-oyınlar sáwlelendirilgen kórgizbe menen baslandı. Kórgizbege kelgen elimiz puqaraları hám miymanlar kóp milletli Qaraqalpaqstannıń milliy ózgesheliklerine gúwa boldı. Professor-oqıtıwshılar hám studentler birgelikte milliy qosıqlardı atqarıp, qız-jigitler aytısıp, milliy saz ásbapları menen óz ara dásme-dáske tústi. Bayram tamashalarına kelgen miymanlar kórgizbege qoyılǵan milliy taǵamlar – Nawrızlıq góje, súmelek, jarma, júweri gúrtik, biyday gúrtik, zaǵara, máysók, iyjan, taqan hám usı sıyaqlı taǵamlardan dám tattı.
Bir tárepte kórgizbe bolıp atırǵan bolsa, universitettiń sport sarayı aldında barlıq fakultetlerdiń professor-oqıtıwshıları, studentleri hám barlıq xızmetkerleri arasında milliy oyınlar – arqan tartısıw, gúres, tas kóteriw sıyaqlı oyınlar ótkerilip, bayramǵa sán-saltanat baǵıshladı.
Bunnan soń bayramnıń hámme asıǵa kútken «Áziz Watanlaslar, hár kúnińiz Nawrız bolsın!» atamasındaǵı teatrlastırılǵan ádebiy-muzıkalıq bólim de baslanıp ketti. Onda universitet rektorı A.Reymov shıǵıp sóylep, shıǵıs kalendarı boyınsha jańa jıl bayramı, tınıshlıq, tatıwlıq hám awızbirshiliktiń belgisi bolǵan Nawrız áyyyamı menen barlıq jıynalǵanlardı qızǵın qutlıqladı. Ol óz sózinde universitettiń usı kúnge shekemgi aralıqta qolǵa kirgizgen jetiskenlikleri haqqında ayta kelip, bunday tabıslardıń bunnan bılay da mol bolıwı ushın hár birimiz ayanbay miynet etiwimiz kerekligin aytıp ótti.
Sońınan teatrlastırılǵan bayram tamashaları Xojeli rayonındaǵı Mehribanlıq úyi tárbiyalanıwshılarınıń atqarıwındaǵı «Nawrız keldi» atamasındaǵı balalar qosıǵı menen baslandı. Bayram sawǵalar menen sulıw. Óz talant hám qábiletlerin kórsetip, xalıqtıń alǵısına miyasar bolǵan bul kishkene balalar universitet rektoratı tárepinen tayarlanǵan bayram sawǵaları menen sıylıqlandı.
Bayram tamashasına jıynalǵan xalqımız universitet studentleri atqarıwındaǵı «Qız uzatıw toyı» atamasındaǵı folklorlıq bólimdi tamashalap, ata-babalarımızdan miyras bolıp kiyatırǵan qız uzatıw dástúri, ondaǵı qızıqlı oyınlar, dásme-dás aytısıwlar hám úrp-ádetlerge gúwa boldı.
Qaraqalpaqstan – kóp milletli mákan. Bul jerde áyyemnen túrli millet wákilleri tınısh-tatıw, awızbirshilikte jasap kelgen. Nawrız doslıq, paraxatshılıq bayramı bolǵanlıqtan, bayram tamashalarında túrkmen, qazaq, koreec, rus xalıqlarınıń milliy qosıqları, ayaq oyınları atqarıldı. Al usı bólimniń aqırında jańlanǵan «Lázgi»ge barlıq jıynalǵanlar ayaq-oyınǵa túsip, kewillerin kóterdi.
Universitette oqıp bilim alıp atırǵan studentler tek ǵana ilim-bilim tarawında emes, sonıń menen birge, sport tarawında elewli jetiskenliklerdi qolǵa kirgizip kelmekte. Bayram tamashalarında dúnya júzilik, Aziya hám Ózbekstan birinshiliklerinde sıylı orınlardı iyelep, universitetimiz, sonday-aq, elimizdiń maqtanıshına aylanǵan sportshı jaslardıń shıǵıwları hámmege úlken zawıq baǵıshladı.
Nawrızdıń sáni, álbette, súmelek taǵamı esaplanadı. Tamashaǵa kelgen miymanlar hám xalqımız usı taǵamnan dám tatıp, jaqsı niyetlerin bildirdi.
Bayram tamashaları universitettiń «Húrliman» xalıq ansambli hám elimizdiń kózge kóringen kórkem óner ǵayratkerleriniń atqarıwındaǵı qosıq hám ayaq-oyınlar menen dawam etti.
Qullası, universitette ótkerilgen Nawrız bayramı xalqımızdıń kewillerin xosh etip, awızbirshiligin jáne bir márte sáwlelendire aldı.
Islam Matekov,
Qaraqalpaqstan xabar agentliginiń sholıwshısı.