«Ózbekneftgaz» kompaniyası 1-aprelden baslap xalıqqa jetkerip beriletuǵın tábiyǵıy gaz tarifleriniń arttırılıwı haqqında xabar berdi. Bul haqqında Gazeta.uz xabar bermekte. Jańa bahalar reestri 16-mart kúni Ózbekstan Qarjı ministrligi tárepinen tastıyıqlandı.

Kelesi aydan baslap 10 metr kub tábiyǵıy gaz bahası esaplaǵısh bolǵan jaǵdayda 2897,4 sum (házirgi waqıtta – 2634 sum, ósiw dárejesi – 10 procent) boladı.

Esaplaǵısh bolmaǵan jaǵdayda, awqat pisiriw hám ıssı suw menen támiyinlew ushın paydalanıwshı 10 kub metr tábiyǵıy gaz bahası 5010,6 (házirgi waqıtta – 4555,9 sum, ósiw dárejesi – 9,9 procent), jılıtıw sisteması ushın – 2323,7 sum (2112,45 sum, ósiw dárejesi – 10 procent) etip belgilendi.

Maǵlıwmat ushın, aqırǵı márte gaz hám basqa kommunallıq xızmetler tarifleri 2017-jıldıń iyul ayında kóbeytilgen edi.

Qaraqalpaqstan xabar agentligi