Hárbir insannıń tuwılıp ósken eline degen súyispenshiligi, kózqarası ózgeshe boladı. Nege degende, tuwılıp, kamalǵa kelip, balalıǵı ótken mákan insan ushın hár nárseden-áziyz. Ásirese, biziń Watanımız bolǵan Ózbekstan Respublikasında ana jurtqa, tuwılıp ósken elge, jasap atırǵan zámiynge degen muhabbat ayrıqsha. Sebebi, mámleketimizde alıp barılıp atırǵan siyasattıń tiykarǵı máseleleriniń biri: “Watanǵa degen muhabbattı asırıw hám bekkemlew” bolıp tabıladı. Ǵárezsizlikke erisken jılları birinshi prezidentimiz Íslam Karimov tınıshlıqtı saqlaw máselesine itibar berip, kewil bólgen. Xalıq ushın kúndi kún demey, túndi tún demey xızmet etip atırǵan áskerlerimizge arnawlı “Watan qorǵawshıları kúni” sıpatında 1992-jıl 14-yanvar kúni Ózbekstan Respublikası Joqarǵı Keńesi tárepinen qarar qabıl etilip, hár jılı 14-yanvar mámleketimizde “Watan qorǵawshıları kúni”bayramı sıpatında ótkeriletuǵın boldi. Birinshi prezidentimizdiń múnásip dawamshısı bolıp Shavkat Mirziyoyev heshbir tarawdı itibardan shette qaldırmay, óz reformaların alıp barıp atır. Prezidentimizdiń pikirleri negizinde insan qádirin ulıǵlaw máselesi turǵanlıǵı ushın da búgin jámiyetimiz rawajlanıp keleshekke qaray umtılıp atır.
Kelshegimiz tiykarı, haq-huqiqlarımız tárezisi, ádil bahalawshısı,mámlekettiń tiykarǵi nızamı bolǵan konstituciyamizda Watanımızdı qorǵaw máselesine arnalǵan statyalar bar, álbette. Bul da xalqımızdın nızam tiykarında tınısh ómir súriwin támiynleydi. Watandı qorǵaw tek ǵana áskerlerimizdiń emes, pútkil xalqımızdıń minneti. Mámlekette jasap atırǵan hár qanday puqara onıń keleshegine biyparıq qaray almaydı. Sol sebebli de biz jámiyetimizdegi hárbir adam qále shipaker, qále muǵallim, qále jazıwshı-shayır bolsın bulardın bári watan qorǵawshıları bolıp esaplanadı. Xalmurat Saparovtıń “Jas ásker” qosıǵı joqariıdaǵı pikirimiz dálili bola aladı:

Qolda qural,boyımda kúsh palwanman,
Bul kúshti men tuwǵan elden alǵanman.
Eldi qorǵap kózdiń qarashıǵınday,
Paraxat ómirge bekkem qorǵanman.

Haqıyqatında da, Watanımızdıń tınıshlıǵın saqlawda áskerlerge xalqımız kúsh-quwat beredi. Tarıyxta da el-xalıq táǵdirine itibarsız qarap qoymastan, onıń jaqtı keleshekti kóriwin arzıw etip basqınshılarǵa qarsı shıqqan azamatlar bar. Olar xalıq dep janın pida etkendey ayanbay xizmet qılǵan Ernazar Alakóz, Maman biy, Aydos batır, Allayar Dosnazar siyaqlı batırlar bolıp tabıladı.”Er jigit eli ushın tuwıladı, eli ushın óledi”-degen naqıl sonday batırlarǵa arnalǵan.
Búgingi zamanımızdıń qaharmanları bolǵan áskerlerimizdiń turmıs sharayatları da prezidentimiz itibarinan qalǵan joq, desek asıra aytqan bolmaymız. Mısalıǵa múddetli áskeriy xızmetti orınlap bolǵan áskeriy usınısnama alǵan áskerlerge Joqarı Oqıw Ornına kiriwdegi testten jiynalatuǵın ballarına 10%qosıp beriletuǵın boldı, perzentleriniń múddetli xızmet waqtında shańaraq aǵzaları jer salıǵınan azat etiledi, sonday-aq 1994-jıl 3-oktyabrdegi Ministrler Mekemesiniń qararına muwapıq bir aylıq múddetli áskeriy xızmet, eki aylıq miynet stajına teńlestirildi. Bul bir yarım jıllıq múddetli áskeriy xızmet úsh jıllıq miynet stajına teń degeni. Usınday imkaniyatlardan paydalanıp atırǵan áskerlerimiz taǵı jankúyerlik penen xızmet etiwden sharshamaydı.
Jaqında kirip kelgen 2022-jıldıń dáslepki kúnleri de quwanıshlı bayram “Watan qorǵawshıları kúni” menen baslanıp atır. Aradan qansha jıllar ótip, qarar qabıl etilgenligine 30 jıl tolıw múnásibeti menen elimiz sheksiz quwanıshta bayramdi kewilli kútip almaqta. Kutip almaqta degennen keyin: Biz de pikirimizdin juwmagi sipatinda mamleketimizdin bekkem tiregi, xalqimizdin isenimi bolgan Watan qorgawshilarin ” 14- yanvar Watan qorgawshilari kuni” bayrami menen qutlıqlaymiz! Baxıtlı keleshegimiz ushin hámiyshe saw bolın deymiz.

Habibullayeva Umida Abdulla qizi.
Nawayi Mamleketlik pedagogikalıq instituti ózbek tili hám ádebiyatı fakulteti qaraqalpaq tili adebiyati jónelisi 2-kurs studenti