Mámleketimiz Prezidenti Oliy Majlis hám Ózbekstan xalqına múrájatında 2025-jılı erisilgen jetiskenliklerdi atap ótip, qanshelli awır bolmasın, xalqımız óziniń mashaqatlı hám pidákerlik miyneti menen úlken sheklerdi iyelegenin atap ótti.

Ásirese, mámleketimiz basshısınıń 2026-jıldı elimizde “Máhálleni rawajlandırıw hám jámiyetti ilgeriletiw jılı” dep járiyalaw usınısı úlken áhmiyetke iye boldı. Nátiyjede máhállege mánzilli hám juwapkershilikli qatnas qáliplespekte. Derlik 15 jıllıq miynet jolınıń tiykarǵı bólegi máhálleler menen baylanıslı bolǵan Nókis qalasındaǵı “Qutlı mákan” mákan puqaralar jıyını baslıǵı Zamira Qutlımuratova da “máhálle abat bolsa – jámiyet turaqlı boladı. Insan razı bolsa – reformalar óz nátiyjesin beredi” degen principti óziniń súrenine aylandırǵan.

1967-jılı Shımbay rayonında tuwılǵan Z.Qutlımuratova jaslıǵınan jámiyetke tez aralasıwshańlıǵı, ziyrekligi menen adamlardıń itibarına tústi. 1988-jılı házirgi Berdaq atındaǵı Qaraqalpaq mámleketlik universitetin tamamlaǵannan keyin 15 jıl muǵallim sıpatında jumıs alıp bardı hám kóplegen ekonomist-qánigelerdiń jetisip shıǵıwına óz úlesin qostı.

Búgingi kúnde ol 9 mıńǵa shamalas xalıq jasap kiyatırǵan “Qutlı mákan” MPJ nı basqarıp kelmekte. Bul máhálle 2 mıńnan aslam shańaraqqa tálim-tárbiya orayı bolıp xızmet etpekte. Ótken jılı máhállede qıytaq jerlerdiń suwǵarıw sisteması jaqsılandı, turaqlı elektr energiyası hám optikalıq talshıqlı internet tarmaǵı menen támiyinlendi. Ishki jollar ońlanıp, “Abat xojalıq – abat kóshe – abat máhálle” normaları engizildi hám máhálleniń kórinisi pútkilley ózgerdi. Máhálleni qurılıs-ońlaw hám abadanlastırıw orayına aylandırıw jumısları maqtawǵa ılayıq.

Sonday-aq, máhálle aymaǵındaǵı 50 ge shamalas sawda dúkanı, 4 ulıwma awqatlanıw shaqapshası hám toyxana, dárixana, 3 shashtárezxana aymaqtıń kórkine kórik baǵıshlap, adamlardıń awırın jeńilletip, olardı jumıs penen támiyinlewde qosımsha imkaniyat jaratpaqta. 2026-jıldıń ótken dáwirinde “Kámbaǵal shańaraqlar reestri”ne kirgizilgen 203 shańaraqtıń 35 i “Joybarlaw kózqarası” joybarları tiykarında kredit, ssuda hám subsidiya ajıratıw, isbilermenlikke tartıw arqalı reestrden shıǵarıldı.

Máhálle xalqınıń abat hám payızlı úylerde múnásip jasawı ushın máhálledegi 1 mıń 710 turaq jaydıń ishki hám sırtqı kórinisin zamanagóy kóriniske keltiriw, pardozlaw, olardıń aymaǵında tazalaw, abadanlastırıw hám kóklemzarlastırıw jumısların ámelge asırıw, qıytaq jerlerge egin egiwdi tolıq támiyinlewge itibar qaratılmaqta.

Ulıwma alǵanda, Zamira Qutlımuratova hár bir kúnin jámiyetlik turmıstı ilgeriletiw, xalıqtıń mámleketlik siyasatqa bolǵan isenimin bekkemlew, eń áhmiyetlisi, insanlar ushın múnásip jasaw ortalıǵın jaratıwǵa xızmet etip atırǵan máhálle aqsaqallarınan biri.

Qaraqalpaqstan xabar agentligi.