Mámleketimizde pirotexnika buyımlarınıń nızamǵa qayshı aylanısınıń aldın alıw boyınsha ilajlardıń nátiyjeliligin arttırıwǵa qaratılǵan sistemalı jumıslar ámelge asırılmaqta. Biraq, juwapker ministrlikler hám uyımlar tárepinen anıq maqsetli ilajlar ótkeriliwine qaramastan, respublika aymaǵına shetten pirotexnika quralların nızamsız alıp kiriw jaǵdayları ushıraspaqta.

Sonlıqtan, házirgi waqıtta puqaralarımızdıń, ásirese, jas óspirim balalardıń qáwipsizligin támiyinlew ushın nızamsız túrde pirotexnika quralları aylanısınıń aldın alıw maqsetinde tiyisli uyımlar tárepinen ótkerilip atırǵan arnawlı ilajlar dawam etpekte.

Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi xızmetkerleri tárepinen basqa da huqıq qorǵaw uyımları menen birgelikte Qońırat rayonı aymaǵında operativ ilajlar ótkerildi.

Qalıslardıń qatnasıwında ámelge asırılǵan operativ ilajlar nátiyjesinde, azıq-awqat dúkanınan 300 dana pitarda, usı rayonda jasawshı puqaranıń úyinen 6000 dana pitarda hám 51 dana salyut, Xojeli rayonı aymaǵında “Kobalt” markalı avtomashinadan 2 dana salyut pirotexnika quralları anıqlandı.

Jámi dáslepki bahası 25 million sum bolǵan 6353 dana pirotexnika quralları ayǵaqlı dálil retinde alıp qoyıldı.

Házirgi waqıtta bul jaǵdaylar boyınsha nızamǵa muwapıq sorastırıw jumısları alıp barılmaqta.

Á.Jiyemuratov,

Qaraqalpaqstan xabar agentligi.