27-noyabr kúni mámleketimizge jańadan tayınlanǵan sırt el elshileri tárepinen isenim jarlıqların tapsırıw saltanatlı máresimi boldı.

Ózbekstan Prezidenti jańadan tayınlanǵan elshilerdiń isenim jarlıqların qabıl etti. Mámleketimiz basshısı óz missiyasın baslap atırǵan diplomatiyalıq wákilxanalardıń basshıların qızǵın qutlıqladı.
Máresimnen soń Latviya Respublikasınıń Ózbekstandaǵı Ayrıqsha hám tolıq huqıqlı elshisi Girts YaUNZEMS óz pikirleri menen ortaqlastı:
– Ózbekstan menen turaqlı tariyxıy baylanıslarımız bar. Men ushın eń áhmiyetli wazıypa eki mámleket arasındaǵı ekonomikalıq birge islesiwdi jańa, joqarı basqıshqa alıp shıǵıw bolıp tabıladı. Latviya álleqashan Evropa Awqamına kiriw jolında Ózbekstan ushın strategiyalıq arqa dárwaza wazıypasın atqarmaqta. Bul temir jol baylanısları, tikkeley hawa qatnawları hám avtomobil transportı bolıp esaplanadı. Bul infrastruktura imkaniyatlarınan tolıq paydalanıp, birge islesiwimizdi keńeytiw hám jańa basqıshqa kóteriw múmkin.
Ózbekstandı Oraylıq Aziyadaǵı strategiyalıq áhmiyetli oray sıpatında kóremiz. Sonlıqtan, eki tárepleme paydalı birge islesiw hám birgeliktegi joybarlardı rawajlandırıw tiykarǵı áhmiyetke iye. Málimleme-kommunikaciya texnologiyaları, elektron kommerciya, sonday-aq, jasıl texnologiyalar hám dástúriy ónimler tarawında úlken perspektivalar bar ekenligin kórip atırman.
Mámleketlik xızmetlerdi nátiyjeli shólkemlestiriw, sanlastırıw, awıl xojalıǵı joybarların ámelge asırıw, sertifikatlaw hám standartlastırıw tarawındaǵı tájiriybemizdi Ózbekstan menen belsene bólispektemiz. Bul bolsa mámleketińizdiń Evropa Awqamına eksport potencialın jáne de arttırıwǵa xızmet etedi.
Sonday-aq, universitetler arasında kóplegen birgeliktegi joybarlar ámelge asırılmaqta. Jańa bilimlendiriw baǵdarlamaların engiziwde de tıǵız birge islesip atırmız. Bul baǵdarda izbe-iz miynet hám dawamlılıq tiykarǵı faktor bolıp esaplanadı.
Ministrler dárejesindegi saparlar almasıwı jáne de kóbirek bolatuǵınına úmit etemen. Bul sapar etiwler hám biznes, hám mádeniy birge islesiwdi bunnan bılay da rawajlandırıwǵa xızmet etedi. Sol sebepli, saparlar baǵdarlaması hám almasıwına ayrıqsha itibar qaratıp atırman.

ÓzA