Taxtakópir rayonınıń «Beltaw» elatındaǵı «Tax-tóbe» etno awılında xalıqaralıq etno-mádeniy festivaldıń ashılıw saltanatı ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq jıynalǵanlardı festivaldıń ashılıwı menen qutlıqladı.

Ilajda Ózbekstan Respublikası Prezidentiniń keńesgóyi T.Xudaybergenov, Ministrler Keńesiniń Baslıǵı F.Ermanov, Qazaqstan Respublikasınıń ayrıqsha hám tolıq huqıqlı elshisi Beybut Atamkulov qatnastı. Atap ótilgenindey, biziń úlkemizde ásirler dawamında túrli millet wákilleri óz-ara awızbirshilik penen bir xalıq bolıp, elimizdiń hár tárepleme gúllep- rawajlanıwına ózleriniń múnásip úlesin qosıp kelmekte.

Ózbekstan Respublikası Prezidenti Sh.Mirziyoevtiń Qaraqalpaqstandı sociallıq-ekonomikalıq jaqtan rawajlandırıw boyınsha shıǵarǵan arnawlı párman hám qararları tiykarında, respublikamızdıń barlıq aymaqlarında bolǵanı sıyaqlı, Beltaw awıl puqaralar jıyınında da keń kólemli qurılıs-ońlaw hám abadanlastırıw jumısları alıp barılıp, búgin bul elat shın mánisinde jańasha kelbetke iye boldı. Ásirese, usı puqaralar jıyını aymaǵında jaylasqan Bórshitawdıń biyik shıńına qurılǵan, xalqımızdıń ótmishiminen derek beriwshi, milliyligimizdi ózinde jámlegen «Tax-tóbe» etno-awılı aymaqqa jáne de ózgeshe sán hám shıray baǵıshlamaqta. Sonıń ishinde, elimizdiń kóplegen aymaqları hám sırt ellerden qatnasqan bul ótkerilgen etno-mádeniy festivaldıń da áyne usı orında ótkerilgenliginde tereń mazmun bar.

Sebebi, bul jerde shólkemlestirilgen 70 Qara úy elimizde jasap atırǵan túrli millet wákilleriniń ózligin sáwlelendirip turǵan bolsa, qońsı awıl kórinisin ózinde jámlegen 16 Paxsa úyler arqalı ata-babalarımızdıń jasaw sharayatları menen jaqınnan tanısıw imkaniyatına iye bolamız.

Ótkerilgen festival sheńberinde shólkemlestirilgen túrli ilajlar, tuwısqan xalıqlardıń milliy úrp-ádet hám dástúrlerin ózinde jámlegen túrde saxnalastırılǵan kórinisler, milliy ayaq oyın hám qosıqlar atqarılıwı, xalqımızdıń milliy sport oyınları, baqsı hám jırawlardıń ájayıp shıǵıwları ilaj qatnasıwshılarınıń kewillerin kóterip, olarǵa ózgeshe zawıq baǵıshladı.

Qullası, joqarı dárejede shólkemlestirilgen festival sırt elden kelgen miymanlar hám xalqımızda umıtılmas tásirler qaldırdı.

Qaraqalpaqstan xabar agentligi