Sırt elde jasap atırǵan watanlaslarımız benen turaqlı birge islesiwdi rawajlandırıw, elimizde alıp barılıp atırǵan reformalarda qatnasıwın xoshametlew, olardıń huqıqları menen máplerin qorǵawǵa ayrıqsha itibar qaratılıp kelinbekte.

Bul baǵdarda Prezidentimizdiń 2024-jıl 20-noyabrdegi tiyisli qararı menen elimizdiń sociallıq-ekonomikalıq turmısında belsene qatnasıwǵa umtılıp atırǵan watanlaslarımızdı múnásip xoshametlew maqsetinde “Vatandosh” gúwalıǵı hám “Vatandosh” kartaları engizildi.
Endi “Mámleketlik bajı haqqında”ǵı nızamnıń tiyisli statyalarına usı karta iyeleri hám olardıń shańaraq aǵzaları ushın migraciya hám puqaralıqtı rásmiylestiriw tarawında kórsetiletuǵın ayırım mámleketlik xızmetler ushın mámleketlik bajıdan azat etiliwin názerde tutatuǵın qosımshalar hám ózgerisler kirgizilmekte.
Atap aytqanda, “Vatandosh” kartası iyeleri turǵan ornı boyınsha dizimnen ótkerilgende, olardıń shańaraq aǵzaları ámeldegi viza múddetin sozǵanda, sonday-aq, turǵan ornı boyınsha dizimnen ótkerilgende hám dizimge alınǵan múddeti sozılǵanda, mámleketlik bajıdan azat etiliwi názerde tutılmaqta.
Bul tártiplerdi názerde tutatuǵın nızam joybarı Oliy Majlis Nızamshılıq palatasındaǵı Xalıq demokratiyalıq partiyası frakciyasınıń májilisinde kórip shıǵıldı.
Dodalawlar dawamında deputatlar bul nızam joybarı sırt elde jasap, jumıs alıp barıp atırǵan watanlaslarımız benen baylanıslardı bunnan bılay da bekkemlewge, olardıń mámleketimizdiń sociallıq-ekonomikalıq rawajlanıwına qosıp atırǵan úlesin arttırıwǵa xızmet etetuǵının atap ótti. Sonday-aq, watanlaslarımızǵa Ózbekstan aymaǵında isbilermenlik, investiciyalıq, ilimiy, aǵartıwshılıq hám mádeniy jumıs penen shuǵıllanıwı ushın qolaylı huqıqıy, sociallıq sharayatlardı jaratıwǵa xızmet etetuǵının aytıp ótti.

ÓzA