Ózbekstan Respublikası Oliy Majlisi Senatınıń onınshı jalpı májilisi búgin óz jumısın dawam ettirmekte. Onda Senat hám Húkimet aǵzaları, ministrlikler hám uyımlardıń basshıları, ǵalaba xabar qurallarınıń wákilleri qatnaspaqta.

Senat Baslıǵı Tanzila Norboeva basqarıp atırǵan májilis videokonferencbaylanıs sistemasınan paydalanǵan halda ótkerilmekte. Májilis processleri Senattıń YouTube tarmaǵındaǵı rásmiy beti arqalı onlayn jarıtılmaqta.
Jalpı májilistiń birinshi jumıs kúninde juwapkershiligi sheklengen jámiyetler, baspa jumısı, Jáhán sawda shólkemine aǵza bolıw processlerin jáne de jedellestiriw, kreditorlardıń girew menen támiyinlengen talapların qanaatlandırıw, transport xızmetin kórsetiwdi jetilistiriw, bilimlendiriw xızmetlerin kórsetiwdi sistemalastırıwǵa qaratılǵan nızamlar maqullandı.
“Mámleketlik sociallıq qamsızlandırıw haqqında”ǵı nızam wákillikli uyımnıń wákillikleri hám wazıypaları ashıp berilmegeni hám basqa da kemshilikleri bolǵanı ushın biykar etildi.
Jalpı májilistiń ekinshi jumıs kúninde parlamentlik qadaǵalaw sheńberindegi bir qatar máseleler, atap aytqanda, Bas prokurordıń prokuratura uyımlarınıń 2024-jıldaǵı jumısı boyınsha esabatı hám Ózbekstan Respublikasında korrupciyaǵa qarsı gúresiw haqqındaǵı milliy bayanat tıńlanadı.
Samarqand wálayatınıń ayırım aymaqlarınıń shegaraların ózgertiw haqqında, studentler arasında jınayatshılıqtıń aldın alıw, oqıwshılardı sapalı sabaqlıqlar menen támiyinlew boyınsha tiyisli shólkemlerge parlamentlik sorawlar jiberiwge baylanıslı máseleler dodalanadı.
Awıl xojalıǵın rawajlandırıw, ilimiy-izertlew institutlarınıń materiallıq-texnikalıq bazasın bekkemlew hám tarawda ilim jetiskenliklerin engiziw boyınsha parlamentlik soraw nátiyjeleri, Joqarǵı sudtıń quramına ózgerisler kirgiziw haqqındaǵı másele kórip shıǵıladı.
Májiliste kórip shıǵılatuǵın barlıq máselelerdi tolıq sáwlelendirip baramız. Bizdi baqlap barıń!

ÓzA