Beruniy rayonında jaylasqan Tınıshlıq awıl puqaralar jıyınında jaslardıń turmısında áhmiyetli waqıya júz berdi. Máhállede zamanagóy universal sport maydanı qurılıp, iske qosıldı. 2024-jılı “Bes baslama olimpiadası” Respublikalıq basqıshında jeńil atletika boyınsha sıylı 1-orındı qolǵa kirgizgen 16-21 jastaǵı qızlar komandası bul jeńisti óz máhállesin quwandırıw hám jaslarǵa sawǵa sıpatında usındı, – dep maǵlıwmat beredi rayon hákimliginiń Málimleme xızmeti bólimi.

Maydan túrli sport túrleri menen shuǵıllanıw ushın mólsherlengen bolıp, jaslardı salamat turmıs tárizine baǵdarlawda úlken áhmiyetke iye.

2025-jılı da Tınıshlıq awılınıń jasları jańa tabıslarǵa eristi. Qızlar komandası jáne 1-orındı, jigitler komandası bolsa 3-orındı iyelep, rayon dárejesinde maqtanıshlı nátiyjelerdi kórsetti. Jeńimpazlarǵa Beruniy rayonı hákiminiń orınbasarı D.Karimov tárepinen minnetdarshılıq xatları hám estelik sawǵaları tapsırıldı.

Ilaj sońında jaslar ushın arnawlı koncert baǵdarlaması shólkemlestirildi. Jergilikli dóretiwshiler hám jaslardıń qatnasıwındaǵı shıǵıwlar boyınsha kútilgeninen de joqarı keypiyat húkim súrdi. Bul keshe jaslar ushın tek ǵana bayram emes, al maqtanısh hám ilham dáregi boldı.

Tınıshlıq awılında jaslar sport arqalı óz potencialın kórsetpekte. Máhállede jaratılǵan jańa sharayatlar jas áwladtıń salamat hám belsendi turmıs keshiriwine xızmet etedi.

Qaraqalpaqstan xabar agentligi