CH.Abdirov atındaǵı Mádeniyat sarayında Berdaq atındaǵı Qaraqalpaq mámleketlik universiteti qurılıs fakultetiniń shólkemlestiriwi menen «Ózbekstan-ulıwma úyimiz» súreni astında «Biz bir shańaraq perzentlerimiz» atamasında milletler aralıq tatıwlıq hám doslıq festivalı bolıp ótti.
Festivalǵa universitet basshıları, professor-oqıtıwshıları hám student-jasları qatnastı.
Ilajda Qaraqalpaqstan Respublikası Joqarǵı Keńesiniń komitet baslıǵı M.Atamuratov, Respublikalıq Ruwxıylıq hám aǵartıwshılıq orayı Qaraqalpaqstan bóliminiń baslıǵı T.Atamuratov, Berdaq atındaǵı Qaraqalpaq mámleketlik universitetiniń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov hám qurılıs fakulteti dekanı T.Uzaqovlar elimizde xalıqlar arasında doslıq hám tatıwlıqtı bekkemlew jolında alıp barılıp atırǵan mámleketlik siyasattı qızǵın qollap-quwatlap, bul baǵdarda Prezidentimizdiń basshılıǵında kóplegen unamlı ilajlar ámelge asırılıp atırǵanın ayrıqsha atap ótti.
-Universitetimiz Ózbekstandaǵı eń iri joqarı oqıw orınlarınıń biri bolıp, búgingi kúni oqıw dárgayımızda 27 mıńnan aslam student-jaslar oqıp bilim almaqta,-dedi universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov.-Olardıń arasında 16 millet wákilleri bolıp, olar bir atanıń balalarınday awızbirshilikli, tınısh-tatıw, óz-ara doslıqta jasap, tálim alıp atır. Ótkerilip atırǵan bul festival usınday tatıwlıqtıń ayqın kórinisi bolıp tabıladı.
Ilaj dawamında festival sheńberinde ótkerilgen bir qatar tańlawlarǵa belsene qatnasıp, jeńimpazlıqtı qolǵa kirgizgen studentler hám olardıń ata-analarına shólkemlestiriwshiler tárepinen tayarlanǵan arnawlı, diplom, sertifikat hám Minnetdarshılıq xatları saltanatlı jaǵdayda tapsırıldı.
Festival qurılıs fakulteti student-jasları hám «Húrliman» ansambli aǵzaları tárepinen tayarlanǵan, xalıqlar doslıǵın sáwlelendiriwshi koncert baǵdarlaması menen oǵada zawıqlı ótti.
Adilbay Orazov
Qaraqalpaqstan xabar agentligi sholıwshısı.