6-9-aprel kúnleri aralıǵında Moynaq rayonında 2011-jılı tuwılǵan jas óspirimler  arasında Sport mektepleri futbol ligası jarısı óz juwmaǵına jetti.

Jarısqa respublikamızdıń barlıq aymaqlarınan 15 komanda qatnastı.

Úsh kún dawam etken jarıstıń yarım finalda  Qanlıkól, Taxtakópir, Moynaq hám Xojeli rayonları jas futbolshıları óz-ara bellesti. Bellesiwlerde Qanlıkól rayonı komandası taxtakópirli futbolshılardı penaltiler seriyasında jeńip shıqqan bolsa, Moynaq hám Xojeli rayonları komandaları arasındaǵı oyında miymanlardıń qolı bálent keldi.

Solay etip, jarıstıń finalında  Xojeli hám Qanlıkól rayonları ushırastı hám onda xojelishi jas óspirimler 1:0 esabında jeńip shıǵıp, Qaraqalpaqstan futbol ligasınıń jeńimpazına aylandı.

Al, qola medalı ushın bolǵan ushırasıwda bolsa, Taxtakópir rayonı komandası maydan iyelerin jeńip shıǵıwǵa miyasar boldı.

Turnir sońında sıylı orın iyeleri shólkemlestiriwshiler tárepinen diplom, kubok hám medallar menen sıylıqlandı.

Adilbay Orazov,        

Qaraqalpaqstan xabar agentligi sholıwshısı.