Usı jıldıń 31-mart-5-aprel kúnleri aralıǵında Braziliyanıń Fos-du-Iguasu qalasında erler arasında boks boyınsha Jáhán kubogi bellesiwleri bolıp ótken edi.

CHempionatta Ózbekstan saylandı komandası 5 altın, 2 gúmis hám 1 qola medalın jeńip alıp, ulıwma komandalıq esapta birinshi orındı iyelewge miyasar boldı.

Komandamızdıń bunday úlken jetiskenliklerdi qolǵa kirgiziwinde qaraqalpaqstanlı jas boksshi Madiyar Daniyarovtıń da qosqan salmaqlı úlesi bar ekenligin atap ótiwimiz kerek.

Atap aytqanda, 60 kg salmaqta bellesiwlerge túsken boksshimiz  yarım finalǵa shekem jetip kelip, chempionattıń qola medalı menen sıylıqlanǵan edi. Madiyardıń qolǵa kirgizgen bul tabısı respublikamızdıń sport tariyxına altın háripler menen jazıladı desek boladı. Sebebi, bunnan aldın Qaraqalpaqstan boksi tariyxında jáhán chempionatı jarıslarında hesh qanday medal qolǵa kirgizilmegen edi.

Madiyar Daniyarovtıń erisken bul tabısı menen qutlıqlaw hám qollap-quwatlaw maqsetinde,   Tashkent qalasınan kelgen boksshini Nókis xalıqaralıq aeroportında respublikamız basshıları hám keń jámiyetshilik wákilleri saltanatlı túrde kútip aldı.

Kútip alıw máresiminde Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Joqarǵı Keńestiń komitet baslıǵı M.Atamuratov, Sport ministri E.Qutıbaevlar Madiyar Daniyarovtı erisken bul tabısı menen qutlıqlap, onıń aldaǵı xalıqaralıq jarıslarda da bunnan da úlken jetiskenliklerdi qolǵa kirgiziwine tilekleslik bildirdi.

-Meniń azı-kem erisken tabısıma quwanıp, quwanıshımdı bólisiw hám qutlıqlaw ushın kútip alıwǵa kelgen elimiz basshıları hám sport jakúyerlerine ayrıqsha raxmet aytaman,-deydi Madiyar Daniyarov.-Álbette, hár qanday sportta da tabıs óz-ózinen bolmaydı. Bunıń ushın qolaylı sharayat hám tájiriybeli ustazlar kerek. Meniń de búgingidey jetiskenlikke erisiwimde ádiwli ata-anam hám ustazım Sharap Aytbaev, Ózbekstan saylandı komandası bas treneri Twlqin Qlichev, Qaraqalpaqstannın bas treneri Alisher Áwezbaev, boks federaciyası basshılarına úlken raxmet aytaman. Aldaǵı waqıtları da ózime bildirilgen isenimdi tolıq aqlap, jáhán arenalarında mámleketimiz bayraǵın bálentlerge jelbiretiw ushın bar kúsh-jigerimdi jumsayman.

Qaraqalpaqstan xabar agentligi