Pútkil xalqımız bıyılǵı Ramazan ayın hár tárepleme múnásip ótkerip, ullı áyyyam – mubárek Ramazan hayıtın kóterińki ruwxta belgiledi.

Shınında da, shın mánisinde adamgershilik ideyası sáwlelengen  múqaddes islam dininiń iygilikli qádiriyatları búgingi kúnde Jańa Ózbekstanda ámelge asırılıp atırǵan reformalarǵa qanshelli úylesikli ekeni Ramazan ayında jáne de ayqın kózge taslanbaqta.

Ruwxıy pákleniw, sabır-qanaat, shúkirlik, qayır-saqawat pazıyletleri ulıǵlanatuǵın bul aydı milliy úrp-ádet hám dástúrlerimizge say túrde joqarı dárejede ótkeriw, elimiz musılmanlarınıń ibadat etiw ámellerin emin-erkin ótewi ushın barlıq sharayatlar jaratıldı.

Bul múbárek aydıń “Ramazan – saqawat, birlik hám keńpeyillik ayı” degen ideya tiykarında ótkerilgeni jámiyetimizde tınıshlıq, doslıq, miyrim-shápáát hám saqawat ortalıǵın jáne de bekkemlewge xızmet etti.

Kem támiyinlengen, járdemge mútáj shańaraqlar, kekse, mayıp hám jalǵız insanlardıń jaǵdayınan xabar alıw, kámbaǵal insanlardıń awırın jeńil etiw, turaq jaylardı hám máhállelerdi abadanlastırıw, úsh áwlad wákilleri qatnasıwında ǵalaba nál egiw ilajları hám basqa da kóplegen qayırqomlıq ilajları ótkerildi.

Usı jıl 30-mart kúni elimizdiń barlıq meshitlerinde, sonıń ishinde, Nókis qalasındaǵı «Imam iyshan Muhammed» jámáátlik meshitinde de múbárek Ramazan hayıtı kóterińki ruwxta kútip alındı. Bul ullı áyyyamda barlıq musılmanlar bir-birin bayram menen qutlıqlap,  usınday ájayıp kúnlerge jetkergenine shúkirshilik etti.

Álbette, búgingidey tınısh turmısımızdıń qádirine jetiw, jámiyetimizde húkim súrip atırǵan túrli millet hám diniy konfessiyalar arasındaǵı keńpeyillikti, bir-birewge bolǵan óz-ara húrmet ortalıǵın jáne de bekkemlew hámmemizdiń tiykarǵı wazıypamız.

Barlıq meshitlerde imam-xatipler Ózbekstan musılmanları mákemesi tárepinen usınılǵan «Ramazan hayıtıńız múbárek bolsın!» tezisi astında bayanat jasap, dinimizdegi úlken bayramlardıń biri – Iydul-fitr kúni ibadatları, sawabı, pazıyletleri haqqında  maǵlıwmatlar berdi.

Ramazan ayı hám hayıtı múnásibeti menen 3492 kem támiyinlengen shańaraqlar, baǵıwshısın joǵaltqan insanlar hám jalǵız kekselerge 1 milliard 967 million 492 mıń sum muǵdarında materiallıq járdemler kórsetildi.

Ramazan hayıtı namazı respublikamızdaǵı 64 meshitte oqıldı. Hayıt namazında jámi 38 mıńnan aslam adam qatnastı. Namazda watanımızdıń rawajlanıwı, elimizdiń abadanlıǵı, xalqımızdıń tınıshlıǵı soralıp pátiya etildi.

Á.Jiyemuratov,

Qaraqalpaqstan xabar agentligi.

M.Habibullaevtıń túsirgen súwretleri.