Milliy baspasóz orayında Ózbekstan Jurnalistler awqamı tárepinen basıp shıǵarılǵan «Altın qálemli jurnalistler» kitabı menen tanıstırıw máresimi bolıp ótti.

Ilajǵa elimizde kózge kóringen ustaz-jurnalistler, media tarawı wákilleri, professor-oqıtıwshılar, student-jaslar mirát etildi.
Máresimdi Ózbekstan Jurnalistler awqamı baslıǵınıń wazıypasın atqarıwshısı Xolmurod Salimov ashıp, «Altın qálemli jurnalistler» kitabın baspaǵa tayarlaw processleri haqqında maǵlıwmat berdi.
– Jańa Ózbekstannıń jańa jurnalistikasın jaratıw boyınsha jumıs alıp barar ekenbiz, bul processte jurnalistikanıń tiykarı esaplanǵan baspa ǵalaba xabar quralların rawajlandırmay, gazeta hám jurnallarımızda ráńbáreńlikti támiyinlemey turıp, maqsetke – milliy jurnalistikamızdıń rawajlanıwına erise almaymız, – dedi Xolmurod Salimov. – Jurnalistikanıń hár qıylı janrlarında oqılatuǵın materiallardı jaza alatuǵın ustazlar bar waqıtta «Ustaz-shákirt» dástúri tiykarında olardıń tájiriybesin jaslarımızǵa úyretiw, qızıǵıwshılıǵın arttırıw boyınsha bir qatar jumıslardı islew áhmiyetli bolıp tabıladı. Áne, usı jumıslar kóleminde ustaz jurnalistler «Altın qálem» tańlawı jeńimpazlarınıń hár qıylı janrlarda sheberlik penen jazılǵan eń saylandı materiallarınan úlgilerdi toplap, kitap halında basıp shıǵarıw ideyası payda boldı. «Altın qálemli jurnalistler» atamasın alǵan bul toplam dóretiwshilerge bul baǵdarda zárúr qollanba sıpatında xızmet etedi.
Máresimde «Yangi Wzbekiston» hám «Pravda Vostoka» gazetalarınıń bas redaktorı Salim Doniyorov hám «Ishonch – Doverie» gazetalarınıń bas redaktorı Husan Еrmatov, belgili jurnalist hám publicist Hurshid Dwstmuhammad, ustaz fotograf Abduǵani Juma, «Guliston» jurnalınıń bas redaktorı Mamatqul Hazratqulov, «Hurriyat» gadetasınıń bas redaktorı Abdurasul Jumaqulov Jurnalistler awqamınıń bul jańa baslamasınıń áhmiyetine toqtap ótti.
– Haqıyqatında da, búgingi kúnde milliy jurnalistikamızda feleton, jurnalistlik úyreniw janrları oǵada az, derlik ushıraspay atır, – dedi «Hurriyat» gazetasınıń bas redaktorı, belgili jurnalist Abdurasul Jumaqulov. – Biz – dóretiwshiler sózdiń qádirin joqarı kóteriwimiz kerek. Búgin tanıstırılıp atırǵan kitap milliy jurnalistikamızdıń jámiyettegi ornın hám abırayın arttırıwda ayrıqsha áhmiyetke iye.
Awqam tárepinen mıń dana basıp shıǵarılǵan bul kitapqa 50ge shamalas ustaz-jurnalistlerdiń publicisika, jurnalistlik úyreniw, ocherk, feleton sıyaqlı 8 janr boyınsha eń saylandı materialları kirgizilgen. Sonday-aq, kitaptan 9 sheber fotojurnalisttiń hár túrli rakurstan alınǵan 70 ke shamalas fotomaterialları orın alǵan.
Bul kitaptı jaratıwda Abdusaid Kwchimov, Ahmadjon Meliboev, Hurshid Dwstmuhammad, Wtkir Rahmatov, Sherzodxon Qudratxwja, Salim Doniyorov, Halim Saidov sıyaqlı ustaz jurnalistler, belgili qálemkeshler menen keńesip jumıs alıp barılǵanın atap ótiw kerek.
Málim etilgenindey, endi awqam tárepinen hár jılı «Altın qálemli jurnalistler» seriyası astında kitap basılıp barıladı.
Ilaj juwmaǵında Awqamǵa jańadan qabıl etilgen aǵzalarǵa gúwalıqlar tapsırıldı.

Nazokat Usmonova,
ÓzA