Oliy Majlis Senatı Baslıǵı Tanzila Norboeva Yaponiya xalıqaralıq birge islesiw agentligi (JICA)niń Ózbekstandaǵı wákilxanasınıń basshısı Bito Yoshibumi menen ushırastı.

Sóylesiw dawamında usı jıl yanvar ayında JICA Prezidenti A.Tanakidiń Ózbekstanǵa saparı hám Prezident Sh.Mirziyoev penen ushırasıwı áhmiyetli waqıya bolǵanı hám Agentlik penen nátiyjeli birge islesiw tariyxında jańa basqısh ashılǵanı atap ótildi.
Ushırasıwda Ózbekstan hám Yaponiya arasındaǵı birge islesiw, ásirese, JICAnıń túrli oqıw joybarları parlamentleraralıq qatnasıqlar hám insan resursların rawajlandırıwda úlken áhmiyetke iye ekenligi atap ótildi.
Bizge belgili, Yaponiya xalıqaralıq birge islesiw agentligi 50 jıldan aslam waqıt dawamında rawajlanıp atırǵan mámleketlerdiń erkin hám turaqlı rawajlanıwın qollap-quwatlaw maqsetinde sociallıq-ekonomikalıq rawajlanıw hám insan resursların rawajlandırıwǵa járdem berip kelmekte.
Bıyılǵı jılı mámleketlik basqarıw, awıl xojalıǵı, energetika, jeke sektor sıyaqlı tarawlarda JICA menen ámeliy oqıwlardı shólkemlestiriw hám bul baǵdarlarǵa hayal-qızlardı keńirek tartıw máseleleri dodalandı.
Sonıń menen birge, keleshekte aymaqlıq parlament wákilleri – jergilikli Keńes deputatları ushın mamanlıǵın arttırıw baǵdarlamaların engiziw boyınsha pikir alıstı.

N.Abduraimova, ÓzA