Sońǵı jılları elimiz ekonomikasınıń tiykarǵı drayverlerinen biri bolǵan qurılıs materialları sanaatında túpkilikli burılıs dáwiri boldı.

Sanlarǵa itibar qaratatuǵın bolsaq, keyingi bes jılda elimizde investiciyalıq ortalıqtı jaqsılaw, isbilermenlikti qollap-quwatlaw baǵdarında alıp barılǵan unamlı reformalardıń nátiyjesinde qurılıs materialları sanaatı jedel pátlerde rawajlanbaqta.
Alıp barılǵan keń kólemli reformalardıń nátiyjesinde tarawda óndiris kárxanalarınıń sanı 10 mıńǵa, qurılıs materiallarınıń túri 100ge jetkerildi.
2024-jıldıń juwmaǵına bola, bul dáwirde 40 trillion sumlıq qurılıs materialları islep shıǵarılǵan. Belgilengen reje 105,4 procentke orınlanǵan. Tarawdıń elimiz sanaatındaǵı úlesi 4,8 procentti quraǵan.
Sonıń ishinde, 44 million kvadrat metr qurılıs aynası, 90 million kvadrat metr gipsokarton, 17,8 million tonna cement, 52 million kvadrat metr keramikalıq plitka, 365 mıń tonna qurǵaq qurılıs aralaspası, 6 mıń tonna gúlqaǵaz sıyaqlı qurılıs materialları islep shıǵarıldı.
– Ótken jılı tarawda jámi 2,2 milliard dollarlıq investiciyalar, sonnan 1,4 milliard dollarlıq sırt el investiciyaları hám kreditler ózlestirilgen, – dedi «Ózsanaatqurılısmaterialları» associaciyası málimleme xızmetiniń basshısı Jamshid Shermatov. – 840 million dollar eksport ámelge asırıldı. Sonıń menen birge, Tayland, Belgiya, Ispaniya, Franciya, Xorvatiya, Irak, Braziliya hám basqa da mámleketlerdiń bazarları ózlestiriliwiniń esabınan ónimlerdiń eksport geografiyası keńeytildi. Ótken jıldıń ózinde qosımsha 10 nan aslam jańa ónim eksport etildi. Qurılıs meterialları eksportın bunnan bılay da keńeytiw, jańa bazarlardı ózlestiriw maqsetinde «Ózsanaatqurılısmaterialları» associaciyası tárepinen sırt ellerde sawda úyi hám qoymaxanaları ashılmaqta. Atap aytqanda, Ázerbayjan, Awǵanstan hám Tájikstan mámleketlerinde qurılıs materialları sawdasına qánigelesken Ózbekstan sawda úyiniń jumısı jolǵa qoyılǵan.
Lokalizaciyalaw baǵdarlaması sheńberinde 3,5 trillion sumlıq qurılıs materialları islep shıǵarılıwı, tarawdaǵı unamlı ózgerisler hám jańa rekordlar elimiz ekonomikasınıń rawajlanıwında áhmiyetli qádem boldı. Qurılıs materialları sanaatınıń jedel rawajlanıwı hám joqarı óndiris kólemi, investiciya hám eksporttıń ósiwi, Ózbekstannıń global bazarlardaǵı statusın bekkemlemekte. Sonday-aq, jańa bazarlar arqalı eksport geografiyasın keńeytiw hám sırt el sawda úylerin shólkemlestiriw boyınsha alıp barılıp atırǵan jumıslar, keleshekte elimiz ekonomikasınıń rawajlanıwına bekkem tiykar jaratpaqta.

Nasiba Ziyodullaeva,
ÓzA