Beruniy hám Tórtkúl rayonında, Qaraqalpaqstan Respublikası Awıl xojalıǵı ministrligi, Agroxızmetler orayı, rayon hákimlikleri hám awıl xojalıǵı bólimleri, Ósimlikler karantini hám qorǵaw agentliginiń rayonlıq bólimleri hám taraw ilimpazları menen birgelikte seminar shólkemlestirildi.
Seminarǵa rayonnıń diyqan fermer xojalıqları hám qıytaq jer iyeleri keńesiniń basshıları, rayonlardaǵı paxta hám ǵálleshilik baǵdarındaǵı barlıq klasterler, awıl xojalıǵı kárxanalarınıń basshıları, shigit egiw otryadlarınıń basshıları, paxta jetistiriw baǵdarındaǵı klasterler hám fermer xojalıqlarınıń basshıları qatnastı.
Maqset – 2025-jıldıń ónimi ushın ǵawasha sortların optimal túrde jaylastırıw hám joqarı nátiyjeli jergilikli intensiv agrotexnologiyalardı engiziw, sonday-aq, ǵawasha tuqımgershiligi menen baylanıslı ilajlardı nátiyjeli shólkemlestiriw bolıp esaplanadı.
Seminarda Qaraqalpaqstan Respublikası Awıl xojalıǵı ministriniń orınbasarı N.Kayupov shıǵıp sóylep, 2025-jıldıń ónimi ushın ǵawasha sortların optimal túrde jaylastırıw hám joqarı nátiyjeli jergilikli intensiv agrotexnologiyalardı engiziw jáne ǵawasha tuqımgershiligi menen baylanıslı ilajlardı shólkemlestiriw boyınsha ámelge asırılatuǵın jumıslar tuwralı maǵlıwmatlar berip, awıl xojalıǵında jumıs alıp barıp atırǵan barlıq kárxanalar menen birge islesiwdi jolǵa qoyıw zárúrligin atap ótti.
Atap ótilgenindey, báhárgi egiske tayarlıq búginnen baslansa, joqarıda atap ótilgen wazıypalar tolıq hám sapalı orınlansa, kútken nátiyjelerimiz unamlı boladı.
Seminarda rayonlıq agro másláhátshiler arqalı innovaciyalıq qollanbalar haqqındaǵı maǵlıwmatlardı aymaqtaǵı diyqan hám fermer xojalıqlarına jetkeriw hám olardan paydalanıw boyınsha óz-ara birge islesiwde usınıslar beriletuǵınlıǵı aytıp ótildi.
Ilajda qatnasıwshılar da ózleriniń pikir-usınısların bildirip, qızıqtırǵan sorawlarına juwap aldı.
Qaraqalpaqstan xabar agentligi