«Ózbekstan – 2030» strategiyasın «Qorshaǵan ortalıqtı qorǵaw hám «jasıl» ekonomika jılı»nda ámelge asırıwǵa baylanıslı mámleketlik baǵdarlama joybarında xalıqtıń salamatlıǵın jaqsılaw, ekologiyalıq turmıs tárizin qáliplestiriw hám insan potencialın ámelge asırıw ushın sharayatlardı jaratıw mámlekettiń rawajlanıwınıń tiykarǵı baǵdarılarınan biri sıpatında belgilengen.

Mámleketlik baǵdarlamada orınalǵan 5 tiykarǵı baǵdarda hár bir insanǵa óz imkaniyatın ámelge asırıw ushın múnásip sharayatlar jaratıw, sociallıq tarawdı rawajlandırıwǵa qaratılǵan maqsetler qamtıp alınǵan.
Senattıń Ilim, bilimlendiriw hám densawlıqtı saqlaw máseleleri hám Xalıqaralıq qatnasıqlar, sırtqı ekonomikalıq qatnasıqlar, sırt el investiciyaları hám turizm máseleleri komitetleriniń birgeliktegi májilisinde usı haqqında sóz etildi.
Bıyılǵı jılı 6 jastaǵı balalardı mektepke tayarlaw sisteması menen qamtıp alıw dárejesin 98 procentke jekteriw, ulıwma orta bililendiriw mákemeleri ushın 65 atamadaǵı jańa sabaqlıqlar, shınıǵıwdápterleri, oqıtıwshı metodika kitapların jaratıw hám ámeliyatqa engiziw sıyaqlı wazıypalar belgilengen. Ulıwma orta bilimlendiriwdi rawajlandırıw ushın jeke menshik sektordı keńnen tartıw maqsetinde mámleketlik emes ulıwma orta bilimlendiriw mektepleriniń sanın 600ge jetkeriw názerde tutılǵan.
Sırt elli ilimiy shólkem hám universitetlerge ilimiy stajirovkaǵa jiberilgen izertlewshilerdiń ulıwma sanında 35 jasqa shekemgi izertlewshilerdiń úlesi 80 procentke arttırıladı.
Densawlıqtı saqlaw tarawında 7,1 million 40 hám onnan úlken jastaǵı xalıq arasında eń kóp ushırasatuǵın júrek qan-tamır, qantlı diabet, ókpeniń juqpalı obstruktivlik kesellikleriniń qáwipin anıqlaw maqsetinde profilaktikalıq tekseriwlerdi ótkeriw hám 3 – 18 jastaǵı 10 million balalarda onkogematologiyalıq keselliklerdi erte anıqlaw boyınsha ǵalaba hám selektiv skriningten ótkeriw ilajları rejelestirilmekte.
Májilis dawamında «Ózbekstan – 2030» strategiyasınıń «Qáwipsiz hám tınıshlıqtı súyiwshi mámleket» principine tiykarlanǵan siyasattı izbe-iz dawam ettiriw baǵdarında mámlekettiń tınıshlıqtı súyiwshi, pragmatikalıq jedel hám izbe-iz sırtqı siyasatın ámelge asırıwǵa baylanıslı 10 maqsetti qamtıp alǵan usınıslar da kórip shıǵıldı.
Ratifikaciyalanǵan xalıqaralıq shártnamalar boyınsha minnetlemelerdiń orınlanıwı ústinen qadaǵalawdı ámelge asırıw, jetekshi xalıqaralıq hám regionallıq shólkemler menen perspektivalı birge islesiw baǵdarların keńeytiw hám Ózbekstan Respublikasınıń BMShtaǵı ornı hám abırayın arttırıwǵa qaratılǵan ilajlar názerde tutılmaqta.
Senatorlar tárepinen ulıwma bilimlendiriw mekteplerinde bilimlendiriwdiń sapasın arttırıw, joqarı bilimlendiriw mákemeleri reytingin jaqsılaw, jas izertlewshilerdiń úlesin arttırıw, olardıń ilimiy izleniwlerin qollap-quwatlaw, sonday-aq, Jańa Ózbekstannıń sırtqı siyasatın xalıq hám mámlekettiń máplerinen kelip shıqqan halda izbe-iz ámelge asırıwǵa qaratılǵan usınıslar bildirildi.
Xalıqaralıq birge islesiw, sırt el investiciyaları hám turizmdi jedel rawajlandırıw hám xalıqqa sapalı medicinalıq járdem kórsetiw boyınsha belgilengen wazıypalardı ámelge asırıwda juwapker ministrlikler menen uyımlardıń birge islesiwin kúsheytiw zárúrligi atap ótildi.
Senatorlar, ekspertler hám qánigeler tárepinen mámleketlik baǵdarlamanıń joybarına bir qatar usınıslar berildi.

N.Abduraimova, ÓzA