Búgin Oliy Majlis Nızamshılıq palatasınıń gezektegi májilisi bolıp ótpekte. Onda bir qatar nızam joybarların dodalaw kún tártibine qoyılǵan.
Májilistiń basında Nızamshılıq palatasınıń Spikeri N.Ismailov usı kúnlerde mámleketimizde «Qorshaǵan ortalıqtı qorǵaw hám «jasıl» ekonomika jılı» mámleketlik baǵdarlaması joybarı keń jámiyetshilik tárepinen qızǵın dodalanıp atırǵanına toqtap ótti.
Bul qollanba hújjetti jáne de jetilistiriw boyınsha usınıs hám baslamalar bildirilip atırǵanı, sonıń ishinde, Oliy Majlis Nızamshılıq palatasınıń deputatları, frakciya hám komitetlerdiń wákilleri de mámleketlik baǵdarlama joybarın dodalawlarda qatnasıp atırǵanın atap ótti.
– Mámleketlik baǵdarlama joybarı siyasiy partiyalar frakciyalarınıń májilislerinde de kórip shıǵılıp, olar ózleriniń usınısların islep shıqpaqta. 22-yanvarǵa shekem jámiyetshiliktiń dodalawı dawam etedi. Usı waqıtqa shekem palatamızda mámleketlik baǵdarlamanıń orınlanıwı hár sherekte tıńlanǵan. Endi jańa Konstituciyamızdıń talaplarınan kelip shıǵıp, jılda eki márte mámleketlik baǵdarlamanıń orınlanıwı boyınsha húkimettiń esabatın tıńlaymız. Parlament usı tiykarda baǵdarlamanıń orınlanıwın támiyinelewde qatnasıp baradı, – dedi Spiker.
Májiliste siyasiy partiyalar frakciyalarınıń basshıları da shıǵıp sóylep, 2025-jılǵı mámleketlik baǵdarlamada názerde tutılǵan maqsetler, onıń mazmunı hám áhmiyeti haqqında óz pikirlerin bildirdi.
Sonıń ishinde, Ózbekstan Еkologiyalıq partiyasınıń jetekshisi, frakciya basshısı Abdushukur Hamzaev 2025-jıl ekologiyaǵa baǵıshlanǵan jıl bolǵanı hám mámleketlik baǵdarlamada 100 maqset, 300 den aslam ilajlardıń kórilgeni, olardıń arasında Еkopartiya tárepinen usınıs etilgen maqsetler orın alǵanı quwanarlı ekenin atap ótti:
– Ásirese, jawın suwlarınan paydalanıw boyınsha usınıslarımız, atmosfera hawasın buzatuǵın, túrli iyis hám zıyanlı zatlardı shıǵarıwshı kárxanalardı qurıwǵa ruqsat bermew, jasıl transportta háreketleniwdi xoshametlew, plastikalıq ónimlerdi azaytıw, Aral mashqalası boyınsha hám shıǵındılar menen baylanıslı usınıslarımız inabatqa alınǵanın ayrıqsha atap ótiw zárúr. Bul partiyanıń wákillerin quwandırıw menenbirge, bizlerge úlken juwapkershilik te júkleydi.
Mámleketlik baǵdarlamanı jetilistiriw, usınıslar beriw baǵdarında aymaqlıq keńeslerimiz, deputatlarımız benen dodalawlar ótkerilmekte. Mámleketlik baǵdarlamanıń orınlardaǵı orınlanıwı boyınsha jámiyetlik hám deputatlıq qadaǵalawdı alıp barıwǵa ayrıqsha itibar qaratamız, – dedi Еko partiya jetekshisi.
Sonday-aq, májiliste qalǵan tórt partiya frakciyasınıń basshıları da shıǵıp sóylep, mámleketlik baǵdarlamanıń joybarına partiya baǵdarlamalıq wazıypalarınan kelip shıqqan halda óz múnásibetin bildirdi. Partiyalar tárepinen berilgen usınıslar joybarda kórilgenin atap ótti. Baǵdarlama joybarın jáne de jetilistiriw hám keleshekte orınlanıwın támiyinlewde belsene qatnasatuǵının atap ótti.
MuhtaramaKomilova, ÓzA