Prezident Shavkat Mirziyoevtiń basshılıǵında densawlıqtı saqlaw tarawında islengen jumıslar hám 2025-jılǵa mólsherlengen tiykarǵı wazıypalar kórip shıǵıldı.
Bul tarawdaǵı sapa ózgerisleri qaladan baslap shetki aymaqlarǵa shekem, balalardan baslap kekselerge shekem – hámmeniń ómirinde sáwlelenedi. Sonıń ushın oǵan ajıratılıp atırǵan byudjet qarjıları hár jılı kóbeytilip barılmaqta. Barlıq sociallıq xızmetler qatarında medicina da xalqımızǵa jaqınlastırılmaqta. Baslanǵısh buwında 18 mıńnan aslam medicinalıq brigada shólkemlestirilgen.
Keselliklerdi anıqlaw hám emlew ámeliyatına zamanagóy texnologiyalar engizilmekte. Qánigelesken medicinalıq xızmette diagnostika usılları 500 den, emlew usılları bolsa 800 den astı. Jeke menshik medicinanıń rawajlanıwına keńnen jol ashılǵanı sebepli xızmetler tarmaǵı hám tańlaw imkaniyatı kóbeydi.
2024-jılı tarawǵa 36 trillion sum ajıratılǵan edi. Bul ótken jılǵa qaraǵanda 25 procentke kóp.
Baslanǵısh buwında 6 túrdegi skrining tekseriwi jolǵa qoyıldı. Nátiyjede 106 mıń adamda qantlı diabet, 194 mıńında júrek-qan tamır, 2 mıńnan aslam hayal-qızda rak, mıńǵa shamalas balada onkogematologiyalıq kesellik erte basqıshta anıqlandı.
Emlewdiń sapası hám nátiyjeliligi ayrıqsha itibar talap etedi. Usı maqsette 2 mıńnan aslam qánige sırt elde qayta oqıtıldı. Nátiyjede aymaqlardaǵı joqarı texnologiyalıq operaciyalardıń úlesi 61 procentke jetti. 43 baǵdardaǵı 191 klinikalıq protokol xalıqaralıq úlgiler tiykarında jańalandı.
Qánigelesken oraylar hám filiallarda bıyıl 100 mıń nawqas jeńilletilgen jollama tiykarında emlendi. 7 qánigelesken oray sapa qadaǵalawı boyınsha xalıqaralıq akkreditaciyadan ótti.
2025-jılı densawlıqtı saqlaw tarawına 41 trillion sum ajıratılıwı názerde tutılǵan. Bul qarjı esabınan jańa emlewxanalar shólkemlestiriw hám úskenelew, quwatlıqlardı keńeytiw, medicinalıq tekseriwge qamtılıwın keńeytiw rejelestirilgen.
Mámleketimiz basshısı bul tarawdaǵı tiykarǵı wazıypa – baslanǵısh buwında medicinanıń sapasın arttırıw ekenin atap ótti. Onıń ushın ministrlik vertikalın aymaqlarda durıs isletiw, ásirese, shetki hám awır rayonlarǵa itibardı kúsheytiw wazıypası qoyıldı.
Túrkiyalı ekspertler 6 aymaqta medicina mákemeleriniń jumısı hám olarda kórsetilip atırǵan medicinalıq xızmetlerdi úyrendi. Úyreniwler nátiyjesinde xalıqqa kórsetilip atırǵan baslanǵısh medicinalıq-sanitariyalıq xızmetlerdi sistemalı reformalaw boyınsha usınıslar islep shıǵılmaqta.
Juwapkerlerge bul máseleni tereń tallap, baslanǵısh buwın transformaciyası boyınsha qarardıń joybarın tayarlaw tapsırıldı.
Usı baǵdardaǵı xızmetkerlerdiń tájiriybe arttırıw baǵdarlaması jetilistiriledi. Teoriyalıq bilim hám kónlikpelerdi iyelewden kompetenciyalardı rawajlandırıwǵa basqıshpa-basqısh ótiledi.
Sonday-aq, kelesi jıl medicina xızmetkerleriniń aylıq lawazım miynet haqıları arttırıladı. Shańaraqlıq shıpakerlerdiń miynet nátiyjeliligi tiykarında ústeme tólew tártibi engiziledi.
Aymaqlarǵa qaratılıp atırǵan itibar izbe-iz dawam ettiriledi. Qaraqalpaqstan Respublikası, Nawayı, Samarqand, Buxara, Xorezm, Qashqadárya wálayatlarında mámleketlik medicinalıq qamsızlandırıw ámeliyatları engiziledi. Oraylasqan laboratoriya xızmetleri keńeytiledi. «Satıp alıwlar orayı» hám onıń 13 aymaqlıq filial shólkemlestirilip, medicinalıq úskenelerden paydalanıw elektron sistema arqalı qadaǵalanadı.
Jáne 35 baǵdarda 400 milliy klinikalıq protokol islep shıǵıladı. 7 qánigelesken oray hám 2 joqarı bilimlendiriw mákemesi xalıqaralıq akkreditaciyadan ótkeriledi.
Májiliste kadrlar máselesine de itibar qaratılıp, medicinalıq oqıw orınlarında bilimlendiriwdiń sapasın arttırıw, onıń ámeliyat penen baylanısın bekkemlew, pitkeriwshilerdiń baslanǵısh buwında tájiriybe arttırıwın shólkemlestiriw zárúr ekenligi atap ótildi.
ÓzA