Usı jıl 13-15-aprel kúnleri paytaxtımızdaǵı I.Yusupov atındaǵı intalı balalar mektep-internatında innovaciyalıq olimpiadanıń «Súwretlew óneri» boyınsha finallıq basqıshı bolıp ótti. Onda 8-klass oqıwshıları arasında birinshi orındı respublikamızdıń Ámiwdárya rayonındaǵı 12-sanlı ulıwma orta bilim beriw mektebi oqıwshısı Zebo Amanbaeva jeńip aldı. 9-10-klass oqıwshıları arasında birinshilik Qashqadárya wálayatı hám Tashkent qalası oqıwshılarına nesip etti.

Solay etip, pútkil Ózbekistan boylap bul olimpiadanıń respublikalıq basqıshı juwmaqlandı. Nátiyjelerge bola, qaraqalpaqstanlı oqıwshılar informatika páninen ekinshi (Ellikqala rayonınan Nafosat Kamalova), ximiya páninen úshinshi (Tórtkúl rayonınan Tumaris Yusupova), fizika páninen úshinshi (Ellikqala rayonınan Nodirbek Iskenderov hám Bekzad Dosjanov), matematika páninen úshinshi (Shımbay rayonınan Damir Dilmuratov, Ellikqala rayonınan Shaxzod Masharipov) orın jeńimpazları boldı.

Esletip ótemiz, ulıwma orta bilimlendiriw pánleri boyınsha Qábiletli oqıwshılar innovaciyalıq olimpiadasında mekteplerdiń 8-9-10-klass oqıwshıları súwretlew óneri, ximiya, biologiya, tariyx, fizika, matematika, informatika pánleri boyınsha bellesedi. Bıyılǵı olimpiadaǵa respublikamızdıń qala hám rayonlarınan jámi 4358 oqıwshı qatnasıp, sonnan 34 i finallıq basqıshqa jollamanı qolǵa kirgizdi. Ózbekstan Respublikasınıń 7 aymaǵında ótkerilgen olimpiadanıń finallıq basqıshında qaraqalpaqstanlı altı oqıwshı orın alıwǵa eristi.

M.PIRNAZAROVA,

Qaraqalpaqstan xabar agentliginiń xabarshısı.