Bismillahir Rahmanir Rahiym.
Allah taalaǵa sheksiz húrmetimiz, Payǵambarımız sallalowu álayhi vasallamǵa bekkem salawatlı sálemlerimiz bolsın.
Húrmetli watanlaslar!
Allaǵa shúkir, gózzal úlkemizde hár tańdı tınıshlıq, qáterjamlıq penen qarsı almaqtamız. Bul ullı nesiybe sebepli, hár tarawda tabıslar, rawajlanıwlar bolmaqta, nesiybeler kúnnen-kúnge zıyada bolıp barmaqta. Bul úlkede watan áziz, onıń qádiri joqarı ekeni, óziniń turmıslıq sáwleleniwin tawıp barmaqta. Ásirese, sociallıq qorǵawǵa mútájler, mayıplıǵı bolǵan insanlar, kámbaǵal shańaraqlarǵa turaqlı ǵamqorlıq kórsetip kelinbekte.
Álbette, sońǵı jılları kem támiyinlengen, baǵıwshısın joǵaltqanlar, járdemge mútáj puqaralar menen mánzilli islesiw boyınsha nızamlı tiykarlar hám xalıqshıl sistema jaratıldı.
Siz áziz watanlaslarımızǵa múrájat eter ekenbiz, sonı ayrıqsha aap ótiwdi qáler edim, sociallıq qorǵaw máselesine Prezidentimizge járdemshi bolıw bárshemiz umtılıp atırǵan abadan keleshek, perzentlerimiz baxtın támiyinlewdiń eń áhmiyetli shárti.
Islam dininde mútájlerge járdem beriw, fizikalıq imkaniyatı sheklengen insanlarǵa miyrim-shápáát kórsetiw, miskin hám biysharalardıń halınan xabar alıw eń sawaplı ámellerden esaplanadı. Múbárek dinimiz qayır-saqawatqa buyıradı eken, onı óz ornına jumsawǵa ámir etedi. Mútáj insanlardıń haqısına qıyanet etiw bolsa awır gúna sanaladı.
Mámleketimizde sociallıq qorǵaw milliy agentliginiń shólkemlestiriliwi xalqımızdıń qálbindegi iygilikli is boldı. Agentlik awır sociallıq jaǵdayǵa túsken hám túsiw qáwipi bolǵan xalıq penen mánzilli jumıs islep atırǵanı, sadaqalardı óz iyelerine jetkerip atırǵanı xalıqımızdı minnetdar etpekte, qálbine quwanısh baǵıshlamaqta. Álbette, mine usınday mehirge mútáj insanlardıń duwası menen mámleketimiz jáne de abat boladı.
Húrmetli watanlaslarımız!
Jaratqanǵa shúkir, tárbiyanıń tiykarǵı tırnaǵı bolǵan mektepke, jaslardı ilim-máripatlı etiwge mámleketimiz tárepinen turaqlı itibar qaratılmaqta. Jańadan-jańa mektepler, baqshalar qurılmaqta. Mámleketimizde orta esapta jılına bir million bala tuwılmaqta. Bul degeni, jeti jıldan keyin bir neshe mıń mektepke talap payda boladı. Solay eken, saqawatlı adamlarımız mektep qurıw yaki ońlaw jumıslarına da úlken itibar qaratıwın usınıs etemiz. Máripat, zıya orayı bolǵan bilimlendiriw dárǵáyların qurıw, abadanlastırıw eń ullı ámellerden bolıp esaplanadı. Sonday-aq, bilimlendiriw mákemeleriniń student hám oqıwshıların materiallıq jaqtan támiyinlew, olardıń kontrakt-shártnamaların tólep beriw, oqıw quralı hám sabaqlıqlardı alıp beriw sawabı turaqlı jazılıp turatuǵın sadaqa boladı.
Áziz watanlaslar!
Ókinishlisi, toylar, shańaraqtaǵı saltanatlar, marhumlardı eslew, haj hám umraǵa barıp-keliwshilerdi kútip alıwǵa baǵıshlanǵan jıyınlar, olardaǵı bir-birinen ótip túsetuǵın, kim ozdıǵa, jarıspaqqa, ısırapqa tolı isler xalqımızdıń awır mashqalalarınan biri bolıp kelmekte.
Usı jerde, zıyalılar, jası kekse ata-apalar, nuraniylarǵa aytar sózimiz, keliń, birgelikte mámleketimiz xalqına, ásirese, joqarıdaǵı sıyaqlı ısırapkershilik hám dábdebe etip atırǵanlarǵa túsindiriw jumısların kóbeyteyik, usı sıyaqlı illetlerdi birgelikte saplastırayıq. Alla taala inam etken mal-dúnyanı ısırıp etiw – úlken gúná ekenin uqtırayıq! Bunıń ornına tapqanlarımızdı sawaplı islerge jumsap, mútájlerge járdem bereyik, mine sonda sawapqa iye bolamız, inshaallah!
Qádirli ulamalar hám imam-ustazlar!
Sociallıq qorǵaw boyınsha elimizdiń baslamaların qollap-quwatlaǵan halda, biz- din ulamaları tómendegi 7 wazıypanı ámelge asırıwdı belgilep almaqtamız:
Birinshi, ulamalar hám imam-xatibler «Qayırqomlıq – kewillerge quwanısh baǵıshlaydı» súreni astında úgit-násiyatlaw jumısların keń kólemde ámelge asırıw.
Ekinshi, hár bir oraylıq meshit 5 den mútáj shańaraqtı atalıqqa alıp, olardıń perzentlerin oqıw kurslarında oqıtıw, kásip-ónerge úyretiw hám turaqlı dáramatqa iye bolıwına járdemlesiw.
Úshinshi, hár bir rayon-qala bas imam-xatibleri aymaǵındaǵı keminde 1 mektepti qáwenderlerdi keńnen tartqan halda ońlaw jumıslarına járdem kórsetiw.
Tórtinshi, «Vaqf» qayırqomlıq jámáát fondı Sociallıq qorǵaw milliy agentligi menen birgelikte mámleketimiz boyınsha kem támiyinlengen shańaraqlardıń perzentleri bolǵan 200 jastı kásipke úyretiw hám jumıs penen bánt etiw.
Besinshi, «Vaqf» qayırqomlıq jámáát fondı «Insan» sociallıq xızmetler orayı menen birgelikte fizikalıq imkaniyatı sheklengen balalarǵa 50 dana sport arbashası hám basqa reabilitaciya quralların alıp berip, olardıń dawalanıwlarına járdemlesiw.
Altınshı, meshit imam-xatibleri qáwenderlerdi keńnen tartqan halda «Mehribanlıq», «Qayırqomlıq», «Múriwbet» úylerine hám miynet nuraniylarına materiallıq járdemler kórsetiw jumısların shólkemlestiriw.
Jetinshi, imam-xatibler tárepinen toy-mereke máresimlerindegi ısırapkershilik, umra ziyaratınan qaytqannan soń hár túrli dábdebeli máresimlerin shólkemlestiriw illetleriniń aldın alıw boyınsha úgit-násiyatlaw jumısların ámelge asırıw.
Áziz watanlaslar!
Qayırlı hám sawaplı iske úles qosqan, jetim-jesirdiń basın sıypalaǵan adamnıń ámel dápterine qıyametke shekem sadaqa beriw sawabı toqtap qalmastan jazılıp turatuǵının, bunday adam xalıq ishinde, el arasında hár qashan húrmet hám itibarda bolatuǵının umıtpayıq!
Alla taala jaqsı islerimizdi Ózi sıylıqlasın, ámin!
Muftiy Shayx
Nuriddin Xoliqnazar,
Ózbekstan musılmanlar uyımı Ulamalar Keńesi baslıǵı.
Qaraqalpaqstan xabar agentligi