Ózbekstan Sawda-sanaat palatası Qaraqalpaqstan Respublikası basqarması tárepinen 2024-jıl dawamında isbilermenlik tarawında belsendilik kórsetkenligi ushın bir topar isbilermenler xoshametlendi.

Ilajda basqarma baslıǵı K.Artıkov 2024-jılda elimizde barlıq tarawlarda, sonıń ishinde, isbilermenlik tarawında da anaǵurlım unamlı nátiyjelerge erisilgenligin, bıyılǵı jıl biznes subyektleri ushın aldınǵı jıllarǵa salıstırǵanda tabıslı jıl bolıp kelgenligin ayrıqsha atap ótti. Isbilermenlerdiń aldaǵı waqıtları da elimiz ekonomikasına ózleriniń múnásip úleslerin qosıp, jańa 2025-jılda bunnan da joqarı nátiyjelerge erisiwine isenim bildirildi.

Bunnan soń, jıl dawamında ayırıqsha belsendiligi ushın “KARAKALPAK PALACE HOTEL” JShJ direktorı Ikram Yuldashevqa “2024-jılda Sawda-sanaat palatasınıń eń belsendi aǵzası” nominaciyası, “LANKO MIYA” JShJ direktorı YANG DENG ke “2024-jılda eń kóp jumıs orının jaratqan isbilermen” nominaciyası, “ATIYAJ-GULZAR” JShJ direktorı Azat Mustafaevqa “2024-jılda eń kóp salıq tólegen isbilermen” nominaciyası, “LAN-C” JShJ direktorı Erkin Kalenovqa “2024-jıldıń eń belsendi eksportshısı” nominaciyası, “DIYOR MARKET KUNGRAD” JShJ direktorı Zulfiya Davletyarovaǵa “2024-jıldıń eń belsendi isbilermen hayalı” nominaciyası, “SHABBAS NUKUS” JShJ direktorı Adilbek Saparniyazovqa “2024-jıldıń eń belsendi jas isbilermeni” nominaciyası, “BABAJANOV STUDIYASI” JShJ direktorı Rashid Babajanovqa “2024-jıldıń eń kreativ isbilermeni” nominaciyası boyınsha sıylıqlar tapsırıldı.

Ilaj sońında isbilermenlerge Sawda-sanaat palatası Qaraqalpaqstan Respublikası basqarması tárepinen tayarlanǵan arnawlı statuetkalar hám sawǵalar berildi.

Qaraqalpaqstan xabar agentligi.