Berdaq atındaǵı Qaraqalpaq mámleketlik universitetiniń shet tilleri fakulteti nemis tili baǵdarınıń 2 studenti Germaniyanıń DAAD oqıw baǵdarlamasınıń grantı jeńimpazı bolǵanlıǵı haqqında aldın bara bergen edik. Olardıń biri – 3-kurs studenti Aydın Sársenbaeva menen sáwbetlestik.
Nemis tili imkaniyatlar esigin ashıp berdi
– Kishkene waqıtlarımnan baslap nemis tiline qızıǵaman hám bul tildi úyreniw men ushın úlken imkaniyatlar esigin ashıp berdi. Universitetimizdiń tájiriybeli professor-oqıtıwshıları menen bull tildiń sırların tereń úyrenip bardım. Sonday-aq, Samarqand, Tashkent hám Ferǵana qalalarında ótkerilgen seminarlarǵa qatnasıp, kónlikpelerimdi arttırdım.
Áwmetli jıl
– Sonı ayrıqsha atap ótiw kerek, 2018-jıl men ushın áwmetli baslandı. Sebebi, Germaniyanıń xalıq aralıq akademiyalıq birge islesiw baǵdarlaması – DAADtıń joqarı oqıw orınlarınıń studentleri ushın arnalǵan jazǵı til úyreniw kursları ushın grantı qolǵa kirgizdim. Bul men ushın úlken jetiskenlik boldı.
Avgustta Kyolnge
– Usı jıldıń avgust ayında Germaniya Federativlik Respublikasınıń Kyoln qalasındaǵı universitette nemis tili boyınsha oqıw kurslarında oqıwdı rejelestirip otırman. Bul kurstıń tiykarǵı maqseti, jaslardı ele de nemis tiline qızıqtırıw, olardıń bilimin jetilistiriw, magistratura basqıshına tayarlaw, sonıń menen birge, Germaniya mádeniyatı, tariyxı menen tanıstırıwdan ibarat.
Keleshektegi rejeler
– Men sıyaqlı til úyreniwge qızıǵatuǵın jaslardı qollap-kuwatlawda eki mámleket arasındaǵı hár bir tarawdaǵı birge islesiwlerdiń joqarı dárejede ekenligi tiykar bolmaqta. Bul oqıw saparı dawamında men nemis tili boyınsha bilim hám kónlikpelerimdi arttırıp, bekkemlep, keleshekte usı baǵdarlama boyınsha Germaniyada magistratura basqıshında oqıwdı niyet etkenmen. Maqsetim, nemis tilin tereń meńgerip, elimiz jaslarına da usı tildi úyretiw arqalı dúnya esiklerin ashıp beriwge kómeklesiw, – deydi grant jeńimpazı Aydın Sársenbaeva.
Sáwbetlesken: Islam Matekov,
Qaraqalpaqstan xabar agentliginiń sholıwshısı.