Usı jıldıń 5-aprel kúni Ózbekstan Respublikası Prezidentiniń «Mektepke shekemgi bilimlendiriw sistemasın jáne de xoshametlew hám rawajlandırıw ilajları haqqında»ǵı qararı qabıl etildi. Bul haqqında Ádillik ministrliginiń «Huquqiy axborot» kanalı málim etti.
Qarar tiykarında mektepke shekemgi bilimlendiriw tarawında mámleketlik-jeke menshiklik birge islesiwdiń tómendegi formaları engizildi:
– mámleketlik emes baqshalar imaratların qurıw ushın, sonıń ishinde xızmet kórsetiwshi mámleketlik baqshalar aymaǵında turaqlı paydalanıw ushın biypul jer uchastkaların usınıw;
– bar bolǵan mámleketlik mektepke shekemgi bilimlendiriw mákemelerin úskenelew hám rekonstrukciyalaw shárti menen mámleketlik emes mektepkeshekemgi bilimlendiriw mákemeleri obektlerin qurıw ushın biypul jer uchuastkaların beriw;
– bos turǵan mámleketlik múlk obektlerin, sonıń ishinde, jumıs islemey turǵan mámleketlik baqshalardı «nol»lik bahada satıw;
– mámleketlik baqshalardıń paydalanılmay turǵan imaratları hám korpusların biypul uzaq múddetli paydalanıwǵa beriw.
Mámleketlik-jeke menshiklik birge islesiw formasına qaray jeke birge islesiwshige tómendegi investiciyalıq minnetlemeler jukletiledi:
– sociallıq qorǵawǵa mútáj bolǵan shańaraqlardan bolǵan belgili muǵdardaǵı tárbiyalanıwshılarǵa jeńillikli ata-ana pulın belgilew (usı aymaqtaǵı mámleketlik mektepke shekemgi bilimlendiriw mákemeleri ushın belgilengen muǵdardan kóp bolmaǵan halda);
– jeke birge islesiwshige biriktirilgen baqshalardı qurıw, rekonstrukciyalaw, kapital ońlaw hám úskenelew jumısların ámelge asırıw.
Mámleketlik-jeke menshiklik birge islesiwde shólkemlestirilgen mámleketlik emes baqshalar tómendegilerden azat etildi:
– eki jıl múddetke belgilengen tártipte tastıyıqlanatuǵın dizim boyınsha alıp kirgizilipatırǵan úskeneler, inventarlar, oqıwlıq qollanbalar hám oyın maydanshaları ushın bajıxana tólemleri;
– óz jumısın baslaǵan kúnnen baslap on jıl múddet dawamında mámleketlik maqsetli qorlarǵa barlıq májbúriy tólemler hám májbúriy ajıratpalardı tólew.
Sonday-aq, 2018-jıldıń 15-aprelinen xızmetkerleriniń ortasha jıllıq sanı 100 ge shekemgi bolǵan baqshalar kishi isbilermenlik subektleri qatarına kirgizildi.
Qaraqalpaqstan xabar agentligi