Nókis qalası turǵını Mırzabay Saparbekovtıń kótergen salmaqlı máselesi házirgi kúnniń eń aktual máselelerinen biri sanaladı. Ol elimizdiń barlıq aymaqlarında sırt ellerdiń texnikasınan qalıspaytuǵın, kerek bolsa, hesh mámlekette ushıraspaytuǵın jańa texnikalardı oylap tabatuǵın qánigeler, yaǵnıy injenerler mektebin jaratıw haqqında usınıs bildiredi.
M.Saparbekov sońǵı waqıtları elimizge kóp muǵdarda investiciyanıń kirgiziliwine baylanıslı injenerlerimiz sol shet eldiń texnikaları menen texnologiyaların basqarıw hám paydalanıwdan arı ótpey, shegaralanıp qalıp atırǵanın ayrıqsha aytıp ótedi. Investorlardıń maqseti – payda kóriw ekenin umıtpawǵa shaqıradı.
– Olar alıp kelgen texnologiya hám texnikalarınan da jaqsı, rawajlanǵan ellerde ele paydalanıwǵa qoyılmaǵan texnikalardı jaratıw kerek, – deydi M.Saparbekov. – Innovaciyalıq texnologiyalardı dóretiw barısında rawajlanǵan mámleketler jańa texnologiyalardı hám texnikalardı óz ellerinde ilajı bolsa sırlı jaǵdayda ózlestiredi hám onnan payda kórip otıradı. «Gónerdi» dep esaplanǵan úskenelerdi texnologiyası menen qosıp, isbilermenlerdiń erkine tapsıradı. Jetkilikli muǵdarda kapitalǵa iye bolǵan isbilermen-investor sol texnikalardı biziń mámleketimizde óndiriske endirip, kelisimli jaǵdayda birgelikte payda kórip otıradı.
Investorlar alıp kelip atırǵan, biz burın kórmegen texnikalar jergilikli injenerlerimiz ushın sırın úyrenip alatuǵın hám qalay islengenin anıq bilip alatuǵın úlgi bolıp xızmet etiwi kerek. Sol texnikalardıń uńqıl-shuńqılın úyrenip alıp, onı jetilistirip, «Made in Uzbekistan» ónimi etip shıǵarsaq, injenerlerimiz qanday kúshli tájiriybege iye bolıp, sınaqtan ótken bolar edi.
Buǵan biziń imkaniyatımız da bar, qabiletimiz de jetedi. Toplanǵan tájiriybeler, bilimler negizinde ózimizdiń jergilikli sharayatımızdan, qollanıw jaǵdaylarınan kelip shıqqan halda sırt ellerdegiden ózgeshe texnologiyalar hám texnikalardı jaratıw maqsetke muwapıq bolar edi.
M.Saparbekovtıń pikirinshe, bunıń ushın haqıyqıy injenerlerdi, texnikalıq úskenelerdiń islew principin, texnikanı remontlawdı, basqarıwdı tájiriybede anıq meńgerip biletuǵın jaslardı tayarlaytuǵın injenerler mektebin shólkemlestiriw kerek.
– Bizde injenerler tayarlaytın orta arnawlı oqıw orınları bar. Men jaqında sonday oqıw orınlarınıń birine – kolledjge bardım. «Kolledjimiz maqtanıshı» degen stend qıstırıwlı tur. Qarasam, bári sporttan orın alǵanlar eken. Birde birewi taza stanok yaki úskene oylap tappaǵan, – deydi M.Saparbekov. – Bul tarawda qánigelerdi oqıtıwda úlken aqsawshılıq bar. Sonıń ushın injenerler mektebin hár bir qala, rayonlarda ashıw kerek.
Esletip ótemiz, Prezidentimiz Shavkat Mirziyoev óziniń Oliy Majliske múrájatında elimiz puqaralarınıń usı sıyaqlı mámleketlik hám jámiyetlik turmısqa baylanıslı áhmiyetli máseleler boyınsha óz usınıs hám pikirlerin bildiriwi ushın Internet tarmaǵında «Meniń pikirim» arnawlı veb-saytın shólkemlestiriw maqsetke muwapıq bolatuǵının atap ótken edi. Sebebi, shın mánisinde mámleketti rawajlandırıwǵa qaratılǵan pikir-usınıstıń dáregi hám avtorı xalıq bolıp tabıladı.
Solay eken, Mırzabay Saparbekov sıyaqlı óz ideyaların júzege shıǵarmay júrgen aqıl iyeleri xalıq ishinde kóplep ushırasatuǵınına gúmán joq.
M.Pirnazarova,
Qaraqalpaqstan xabar agentligi xabarshısı