Xojeli mámleketlik toǵay xojalıǵında Ózbekstan Respublikası Ministrler Kabinetiniń usı jıl 27-yanvardaǵı «Ózbekstan Respublikasında boyan hám basqa dárilik ósimliklerdi jetistiriw jáne sanaat usılında qayta islewdi bunnan bılay da rawajlandırıw ilajları haqqında»ǵı qararınan kelip shıǵatuǵın wazıypalarǵa baǵıshlanǵan ámeliy-oqıw seminarı bolıp ótti.
Ilajda Qaraqalpaqstan Respublikası Ministrler Keńesi Baslıǵınıń orınbasarı S.Xojametov, Ózbekstan Respublikası toǵay xojalıǵı komiteti janındaǵı «Shıpabaǵısh» dárilik ósimliklerdi jetistiriw hám onı qayta islew orayınıń baslıǵı A.Mamatkárimov, Tashkent mámleketlik agrar universiteti Nókis filialınıń professorı M.Ibragimov hám basqalar shıǵıp sóylep, boyan ósimliginiń xalıq xojalıǵındaǵı áhmiyeti, dárilik qásiyetleri hám onı kóbeytiwde aymaǵımızdıń topıraq-ıqlım sharayatınıń qolaylıǵı, onı kóbeytiw usıllarına toqtap ótti. Sonday-aq, ilimpazlar tárepinen boyan egiw, onı tárbiyalaw, jıynap-terip alıw, sanaat usılında qayta islew boyınsha másláhátler berildi.
Atap ótilgenindey, Ózbekstan Respublikasınıń Prezidenti Sh.Mirziyoev ótken jıldıń 15-16-dekabr kúnleri respublikamızǵa saparı waqtında farmacevtika tarawınıń keleshegin joqarı bahalap, dári-dármaq quralları, medicinalıq buyımlardı islep shıǵarıwshılardı qollap-quwatlaw, ishki bazarlarımızdı ózimizde islep shıǵarılǵan joqarı sapadaǵı preparatlar menen toltırıw baǵdarındaǵı ámelge asırılatuǵın perspektivalı joybarlardı engiziw boyınsha kórsetpeler berip, bul baǵdarda qánigeler tayarlaw zárúrligin atap ótken edi. Sonıń menen birge, respublikamızdıń topıraq-ıqlım sharayatı boyan ósimligin kóbeytiw ushın qolaylı, sonıń ushın da onı mádeniylestirilgen halda kóbeytiwdi jolǵa qoyıw kerekligine toqtap ótildi.
Joqarıda atap ótilgen qarardı orınlaw sheńberinde «Boyan hám dárilik ósimliklerdi jetistiriw hám onı qayta islew shólkemleri» birlespesi dúzildi.
Ilajda boyan ósimligin kóbeytiw usılları, onı egiw jáne jetistiriw texnologiyaları, jıynap alıw, medicinada hám azıq-awqat sanaatında qollanıw boyınsha ilimpazlar tárepinen zárúr maǵlıwmatlar berildi.
Qaraqalpaqstan xabar agentligi.