Ózbekstan Respublikası sırtqı isler ministri Abdulaziz Komilov 18-aprel kúni Koreya Respublikası sırtqı isler ministri Kan Gyon Xva menen ushırastı.

Sırtqı siyasat mákemeleriniń basshıları 2017-jıl 22-25-noyabr kúnleri Seul qalasında Ózbekstan hám Qubla Koreya basshılarınıń sammiti nátiyjeli bolǵanın atap ótti. Sóylesiwler sheńberinde mámleket basshıları qabıl etken Birgeliktegi bildiriw hám qol qoyılǵan ulıwma nırqı 10 milliard AQSh dollarınan aslam kelisimlerdi tolıq ámelge asırıw eki el arasındaǵı siyasiy, sawda-ekonomikalıq hám sociallıq-mádeniy salalardaǵı birge islesiwdi sapa jaǵınan jańa basqıshqa alıp shıǵatuǵını atap ótildi.

Sırtqı isler ministrliginde bolıp ótken ushırasıwda siyasiy, sawda-ekonomikalıq, investiciya, mádeniy-gumanitarlıq hám basqa da tarawlarda óz-ara baylanıslardı jáne de rawajlandırıw perspektivaları dodalandı. Tárepler regionallıq hám xalıqaralıq máseleler boyınsha da pikir alıstı.

Koreya Respublikası sırtqı isler ministri óz eliniń Koreya yarım atawındaǵı jaǵdaydı saplastırıw baǵdarındaǵı is-háreketleri haqqında maǵlıwmat berdi.

Óz gezeginde, Ózbekstan tárepi usı jıldıń aprel ayındaǵı koreyalararalıq sammit ótkeriliwin maqulladı hám Koreya yarım atawında tınıshlıq, turaqlılıq jáne qáwipsizlik ornatıw ushın Koreya Respublikasınıń is-háreketlerin isenimli qollap-quwatlaytuǵının tastıyıqladı. Sammittiń unamlı nátiyjeleri Koreya yarım atawınıń qubla hám arqası jáne pútkil regionnıń bunnan bılay da rawajlanıwı hám abadanlıǵı ushın qolaylı sharayat jaratatuǵınına isenim bildirildi.

Usı kúni Koreya Respublikası sırtqı isler ministri paytaxtımızdıń dıqqatqa ılayıq orınlarınan biri – Temuriyler tariyxı mámleketlik muzeyine barıp, Saxıpqıran hám onıń áwladları haqqında gúrriń etetuǵın biybaha eksponatlar menen tanıstı.

ÓzA