Hár jılı elimizde jańa jıl múnásibeti menen ótkeriletuǵın «Prezident shırshası» bayramı balalarımız asıǵıslıq penen kútetuǵın sánelerdiń biri bolıp tabıladı.

Bul bayram qarsańında sociallıq qorǵawǵa mútəj bolǵan shańaraqlardıń perzentlerine Prezident sawǵalarınıń tapsırılıwı kishkene balalarımızdıń kewillerin quwanıshqa bóleydi.
Respublikamızdıń basqa aymaqlarında bolǵanı sıyaqlı, Ellikqala rayonında da «Prezident shırshası» bayramı kóterińki keypiyatta belgilenip ótildi.
Mámleketimiz basshısınıń keleshegimiz iyelerine kórsetken mehir-itibarı hám ǵamqorlıǵın sáwlelendiriwshi bul bayramǵa ellikqalalı balalar menen birge, rayondaǵı sektor basshıları, mákeme, kárxana hám shólkemlerdiń juwapker wákilleri qatnastı.
Keshede rayon hákimi Valijon Niyazimbetov balalardı jańa jıl bayramı menen qutlıqlap, olardıń jaqsı bilim alıp, keleshekte «Úshinshi Renanssans»tıń múnásip áwladları bolıwına tilekleslik bildirdi.
Bunnan soń rayon aymaǵında jasawshı shańaraqlıq balalar úyi tərbiyalanıwshıları, ata-anasınan erte ayırılǵan, ata-anaları Watanımız shegaraların qorǵawda qurban bolǵan balalar hám basqa da sociallıq qorǵawǵa mútəj bolǵan shańaraqlardıń perzentleri ushın «Prezident sawǵaları» saltanatlı jaǵdayda tapsırıldı.
Rayonlıq mádeniyat bólimi hám talantlı balalar tárepinen tayarlanǵan teatrlastırılǵan bayram ilajı bolsa, ellikqalalı balalarǵa kóterińki keypiyat baǵıshladı.

Adilbay Orazov,Qaraqalpaqstan xabar agentligi sholıwshısı.