Ózbekstan Respublikası Prezidenti Shavkat Mirziyoev 12-aprel kúni Ázerbayjan Respublikası Prezidenti Ilhom Aliev penen telefon arqalı sóylesti.

Mámleketimiz basshısı Ilhom Alievti kúni keshe bolıp ótken Ázerbayjan Prezidenti saylawında isenimli jeńiske eriskeni menen shın júrekten qutlıqladı.

Saylaw nátiyjeleri tuwısqan Ázerbayjan xalqı Ilhom Alievti keńnen qollap-quwatlaytuǵının hám oǵan úlken isenim bildiretuǵının, mámleket basshısınıń jeke xızmetlerin jáne elde turaqlılıqtı, izbe-iz ekonomikalıq rawajlanıwdı támiyinlew, xalıqaralıq abıroyın bekkemlew boyınsha ámelge asırılıp atırǵan nátiyjeli siyasattı joqarı bahalaytuǵının jáne bir márte kórsetkeni ayrıqsha atap ótildi.

Kóp ásirlik doslıqqa hám strategiyalıq sheriklikke tiykarlanǵan Ózbekstan hám Ázerbayjan qatnasıqlarınıń izbe-iz rawajlanıp hám bekkemlenip atırǵanı tereń qanaatlanıwshılıq penen atap ótildi. Xalıqlarımızdıń tariyxı, mádeniyatı hám dini ulıwma, ruwxıy qádriyatları, dástúr hám úrp-ádetleri birdey.

Túrli dárejedegi jedel sóylesiwler eki tárepleme óz-ara paydalı birge islesiwdi bunnan bılay da keńeytip, olardı anıq mazmun menen bayıtıwǵa xızmet etkeni atap ótildi.

Óz-ara sawda kólemi turaqlı joqarı pátler menen óspekte, eki eldiń jetekshi kompaniyalarınıń qatnasıwında ekonomika tarmaqları, sonıń ishinde, neft-gaz kompleksinde perspektivalı kooperaciya joybarları islep shıǵılmaqta.

Jańa «Baku-Tbilisi-Axalkalaki-Kars» temir jol magistralı, álbette, pútkil regionda sawda-ekonomikalıq baylanıslardı rawajlandırıwǵa hám tranzit potencialın júzege shıǵarıwǵa xızmet etetuǵını ayrıqsha atap ótildi.

Belsene mádeniy-gumanitarlıq almasıwlar dawam etpekte, qospa ilajlar turaqlı ótkerilmekte.

Mámleketler basshıları, sonday-aq, Ózbekstan-Ázerbayjan kóp qırlı birge islesiwi, regionallıq hám xalıqaralıq áhmiyetke iye tiykarǵı máseleler boyınsha pikir alıstı.

Sóylesiw juwmaǵında Ózbekstan Respublikası Prezidenti Shavkat Mirziyoev Ázerbayjan Respublikası Prezidenti Ilhom Alievti elimizge mámleketlik sapar menen keliwge mirát etti.

Ázerbayjan Prezidenti mámleketimiz basshısına shın júrekten qutlıqlaǵanı hám jaqsı tilekleri ushın tereń minnetdarshılıq bildirip, Ózbekstanǵa sapar menen keliw mirátin qanaatlanıwshılıq penen qabıl etti.

ÓzA