Ózbekstan Respublikası Ádillik ministrligi tárepinen Ózbekstan Respublikası Prezidentiniń «Puqaralardı sociallıq jaqtan qollap-quwatlaw boyınsha qosımsha ilajlar hám ózbasımshalıq penen qurılǵan turaq jaylarǵa múlk huqıqın belgilew boyınsha bir mártelik ulıwma mámleketlik akciyasın ótkeriw haqqında»ǵı Pármanı joybarı tayarlanıp, dodalawǵa qoyıldı. Bul haqqında Ádillik ministrliginiń «Huquqiy axborot» kanalı arqalı málim etildi.
Joybardı islep shıǵıwdan gózlengen maqset, xalıqtıń turaq jayǵa baylanıslı huqıqların ámelge asırıwı hám sociallıq jaqtan qollap-quwatlaw ushın qolaylı sharayatlardı jaratıw bolıp tabıladı.
Joybarda puqaralardıń ózbasımshalıq penen iyelep alınǵan jer uchuastkalarında qurılǵan yamasa imarat qurıw ushın ruqsatnama almastan qurılǵan turaq jaylarǵa múlk huqıqın beriw boyınsha bir mártelik ulıwma mámleketlik akciyasın járiyalaw kózde tutılmaqta.
Akciyanı 2018-jıldıń 31-dekabrine shekem ótkeriw usınıs etilmekte.
Párman joybarın dodalaw 26-aprel kúni juwmaqlanadı.
Qaraqalpaqstan xabar agentligi