Nızam hújjetleri tásirin bahalaw sisteması portalında Ózbekstan Respublikası salıq sistemasın reformalaw koncepciyasınıń joybarı járiyalanǵan. Koncepciya bántleriniń birinde qosımsha qun salıǵı (QQS) stavkasınıń azaytılıwı názerde tutılǵan. Bul haqqında Kun.uz xabar bermekte.

Qosımsha qun salıǵı stavkasın 20% ten 12% ke shekem azaytıw usınıs etilmekte. Bunda onı tóleytuǵınlar sheńberi keńeytiledi. Barlıq biznes subektleri, atap aytqanda, jılına 1 milliard sumnan kóp oborotqa iye jeke tártiptegi isbilermenler de onı tóleydi.

Búgingi kúnde mikrofirmalar hám kishi kárxanalar tek ǵana ıqtıyarlı túrde QQS tóleydi, sawda hám ulıwmalıq awqatlanıw kárxanaları buǵan kirmeydi.

QQSti esaplaw hám tólew mexanizmleri ápiwayılastırıladı. Satıp alınǵan tovarlar (jumıslar, xızmetler), atap aytqanda, shegirilmeytuǵın qárejetler hám kapital qoyılmalar (tiykarǵı qurallar hám materiallıq emes aktivler) boyınsha barlıq “kiriwshi” QQSti esapqa kirgiziw usınıs etilmekte.

Ámeldegi sistemada QQSti tek haqıyqatında da alınǵan hám islep shıǵarılǵan jáne óz talapları ushın paydalanılǵan tovarlar (jumıslar, xızmetler) boyınsha, eger bunda belgili bir shártlerge ámel etilse, esapqa kirigiziw múmkin. Kapital qoyılmalar hám shegirilmeytuǵın qárejetler boyınsha QQS esapqa qabıl etilmeydi.

Awıl xojalıǵı ónimleri kótere tarmaq arqalı satılatuǵın bolsa, onı satıw boyınsha oborotlardı QQS tólewden azat etiw rejelestirilgen.

Salıqqa tartıw kólemin arttırıw maqsetinde, sol qatarı, tovarlardı import etiw dáwirinde QQSti tólew boyınsha nátiyjesiz jeńillikler inventarizaciyadan ótkerilip, biykar etiledi.

Salıq kodeksi hám basqa huqıqıy-normativlik hújjetlerinde kóp sanlı salıq tólewshilerge QQSti tólew boyınsha jeńillikler berilgen, olar tólewden azat etilgen. Kóbinese olar maqsetsiz túske iye bolıp, QQS tólew hám esaplaw shınjırınıń úziliwine alıp keledi.

Qaraqalpaqstan xabar agentligi