Rossiya Federaciyasınıń Kemerovo wálayatında júz bergen waqıyadan soń bunday baxıtsız hádiyselerdiń aldın alıw maqsetinde Qaraqalpaqstan Respublikası Órt qáwipsizligi basqarması tárepinen órt qáwipsizligin támiyinlew boyınsha qıraǵılıq jumısları kúsheytildi. Bul haqqında basqarmanıń aǵa injeneri, kapitan Jańabergen Pirjanov Qaraqalpaqstan xabar agentligine xabar berdi.
Búgingi kúnde basqarma tárepinen ámelge asırılıwı lazım bolǵan ilajlar rejesi islep shıǵılıp, orınlarda tekseriw, úgit-násiyalaw, taktikalıq oqıw-shınıǵıwlar ótkerilmekte.
Solardan 27 bazarlar menen sawda komplekslerinde, 3 teatrda, 18 mádeniyat úyinde, 19 dem alıw baǵında, 3 amfiteatrda, 42 toyxanada, 17 stadion hám 46 sport kompleksinde órt-profilaktikalıq tekseriwler jáne úgit-násiyat jumısları alıp barıldı. Anıqlanǵan kemshilikler dodalanıp, wazıypalar belgilendi hám orınlanıwı qadaǵalawǵa alınbaqta. Bazarlarda, iri sawda komplekslerinde bar bolǵan radiotarmaqlar arqalı órt qáwipsizligi qaǵıydaları talaplarına ámel etiw boyınsha múrájatnamalar berip barılmaqta.
Sonıń menen birge, adamlar kóp toplanatuǵın orınlarda ayrıqsha jaǵdaylar xızmeti jáne tiyisli uyımlar menen birgelikte 41 márte órt óshiriw ámeliy taktikalıq shınıǵıwları ótkerildi.
Esletip ótemiz, jaqında Rossiya Federaciyası Kemerovo wálayatındaǵı «Zimnyaya vishnya» kewil ashar sawda kompleksinde júz bergen órt aqıbetinde 64 puqara (sonnan 41 bala) qurban bolıp, 45 adam dene jaraqatın alǵan edi.
Qaraqalpaqstan xabar agentligi