Nókis qalası hákimliginiń maǵlıwmatına qaraǵanda bıyıl paytaxtımızda úlken kólemdegi iri qurılıs, ońlaw, rekonstrukciyalaw jumısları ámelge asırılıwı rejelestirilgen. Sonnan, «2018-jılǵı Investiciya baǵdarlaması»na muwapıq, mektep hám mektepke shekemgi bilimlendiriw tarawın rawajlandırıw maqsetinde «Bilimlendiriw hám medicina mákemeleriniń materiallıq-texnikalıq bazasın rawajlandırıw qorı» esabınan bir qatar jańa qurılıs jumısları ámelge asırılıwı kútilmekte.
Atap aytqanda, «Qoskól» MPJ aymaǵınan 315 orınǵa mólsherlengen, bahası 4 milliard 290 million sumlıq jańa ulıwma bilim beriw mektebin, 4 milliard 400 million sumlıq balalar muzıka hám kórkem óner mektebin qurıw jumısları alıp barılmaqta.
Sonday-aq, paytaxtımızdaǵı 13-sanlı ulıwma bilim beriw mektebine 1 milliard 300 million sumlıq rekonstrukciya jumısları alıp barılatuǵın bolsa, 21-canlı ulıwma bilim beriw mektebinde 2 milliard 176 million sumlıq iri ońlaw jumısları ámelge asırıladı. Al, 4-sanlı kózi ázziler mektep internatında bahası 500 million sumlıq qosımsha 100 orınlı asxana jańadan qurıladı. Jámi bul qurılıslar ushın 13 milliard sumǵa jaqın qarjı qaratılǵan.
Mektepke shekemgi bilimlendiriw tarawın rawajlandırıw maqsetinde 29 MPJ aymaǵınan jeke isbilermenlerge óziniń esabınan mektepke shekemgi bilimlendiriw mákemesin qurıw ushın arnawlı jer orınları ajıratılıp berilgen.
Qaraqalpaqstan xabar agentligi.