Dushanbe, 8-mart, ÓzAnıń arnawlı xabarshısı Abu Bakir Urozov xabar etedi.

Tájikstan Respublikasınıń Dushanbe qalasında Ózbekstan-Tájikstan isbilermenler keńesiniń birinshi májilisi bolıp ótti.

Oǵan Ózbekstan sawda-sanaat palatasınıń baslıǵı A.Ikramov, Tájikstan Sawda-sanaat palatasınıń baslıǵı Sh.Said, tiyisli ministrlik hám vedomstvolardıń basshıları, eki eldiń 120 dan aslam kishi biznes hám jeke isbilermenlik subektleriniń basshıları qatnastı.

Ózbekstan — Tájikstan isbilermenler keńesi 2017-jıldıń 11-oktyabrinde shólkemlestirilgen bolıp, ekonomikalıq birge islesiwdi keńeytiw, isbilermen hám qarjılıq sheńberler arasında tikkeley baylanıslardı jolǵa qoyıw, kóp tárepleme joybarlardı ámelge asırıwǵa kómeklesiw, eki mámlekettiń biznes toparlarınıń wákillerin birlestiriwde úlken áhmiyetke iye.

Ilajda atap ótilgenindey, sońǵı jıllarda Ózbekstan hám Tájikstanda ekonomikalıq rawajlanıwdıń aldınǵı sistemaları keńnen engizilip atırǵanı jáne jergilikli kárxanalardıń básekige shıdamlılıǵı artıp atırǵanı eki el arasındaǵı sawda-ekonomikalıq baylanıslardı rawajlandırıwda áhmiyetli qádem bolmaqta.

Sawda-ekonomikalıq hám investiciyalıq birge islesiwdiń bunnan bılay da rawajlanıwına kómeklesiw ushın qosımsha ilajlar shólkemlestiriw, biznes wákilleriniń arasında iri forumlar, kórgizbe hám yarmarkalar ótkeriw zárúrligi atap ótildi.

Májiliste túrli tarawlar boyınsha nátiyjeli kelisimlerge erisildi. Keńestiń ekinshi májilisin usı jıldıń ekinshi yarımında Tashkentte ótkeriw boyınsha kelisip alındı.

ÓzA