Ózbekstan Respublikası Prezidentiniń puqaralardıń máwsimlik miynet penen shuǵıllanıw ushın respublikadan sırtqa transportta shıǵıw waqtında qáwipsizlikti támiyinlew ilajları haqqındaǵı qararı qabıl etildi. Bul haqqında Ádillik ministrliginiń «Huquqiy axborot» kanalı málim etti.

Qarar tiykarında:

– 2018-jıldıń 1-mayına shekem – máwsimlik miynet penen shuǵıllanıw ushın puqaralar kóp baratuǵın Rossiya hám Qazaqstan aymaqları jáne qalalarına jańa temir jol jónelislerin engiziw;

– 2018-jıldıń 1-iyunına shekem – máwsimlik miynet penen shuǵıllanıw ushın respublikadan sırtqa shıǵıp atırǵan puqaralar tárepinen talap joqarı bolǵan jónelislerde jańa jolawshı poezdların qoyıw jáne plackart, sonday–aq, ulıwmalıq vagonlardıń sanın kóbeytiw;

– 2018-jıldıń 1-iyulına shekem – máwsimlik miynet penen shuǵıllanıw ushın respublikadan sırtqa shıǵıp atırǵan puqaralardı tasıw ushın zárúr bolǵanda shet el temir jol kompaniyalarınıń respublika aymaǵına kiriwin, Ózbekstan temir jol liniyalarınan Rossiya Federaciyası hám Qazaqstan Respublikası stanciyalarına shekem jolawshı tasıwdı názerde tutqan halda támiyinlew;

– 2018-jıldıń 1-mayına shekem – Ministrler Kabinetine Ózbekstan hawa jolları MAK janında tómenletilgen tariflerde tasıwshı, kem byudjetli aviakompaniya (loukoster) shólkemlestiriw haqqında usınıslardı kirgiziw názerde tutılǵan.

Sırtqı miynet migraciyası agentligi elektron maǵlıwmatlar bazasında dizimge alınǵan máwsimlik miynet penen shuǵıllanıw ushın respublikadan sırtqa shıǵıp atırǵan puqaralarǵa tómendegi jeńillikler berilmekte:

– 2018-jıldıń 1-aprelinen baslap puqaralarǵa plackart hám ulıwmalıq vagonlarǵa temir jol biletleri jáne ekonomlıq klass aviabiletleri bahalarına 20% ke shekemgi shegirme;

– hár bir puqaraǵa temir jol hám aviabilet satıp alıw qárejetleriniń bir bólimin qaplaw maqsetinde 300 mıń summ muǵdarında biyminnet tólem (jılına bir márte).

Qararda máwsimlik miynet penen shuǵıllanıw ushın respublikadan sırtqa shıǵıp baratırǵan puqaralar ushın tómendegilerdi óz ishine alǵan bank hám qamsızlandırıw xızmetlerin kórsetiw názerde tutılǵan:

– AK «Aloqabank»tıń ápiwayılastırılǵan ashıw shártleri menen «VISA-migrant» plastik kartaların engiziw, sonday–aq, AKIB «Ipoteka bank» tárepinen máwsimlik miynet penen shuǵıllanıw ushın respublikadan sırtqa shıǵıp baratırǵan puqaralarǵa 1000 AQSh dolları ekvivalentinde kredit ajıratıw;

– «Wzagrosuǵurta» AJ tárepinen Rossiya Federaciyasına máwsimlik miynet penen shuǵıllanıw ushın baratırǵan puqaralardı kompleksli qamsızlandırıp qorǵaw boyınsha Rossiyada óz wákilxanaların ashıw, jeńillikli tarifler boyınsha puqaralardıń ómiri menen densawlıǵın qamsızlandırıwdı rásmiylestiriw.

Qaraqalpaqstan xabar agentligi