Paytaxtımızdaǵı Imam iyshan Muhammad jome meshitinde Ózbekstan musılmanları basqarması tárepinen ótkerilip atırǵan «Quran jarısı»nıń respublikalıq basqıshı bolıp ótti.
Onda jarıstıń aymaqlıq basqıshlarında jeńimpaz bolǵan puqaralar óz bilimlerin kórsetip, kúsh sınastı.
Usı mánásibet penen ótkerilgen saltanatlı máresimde Qaraqalpaqstan Respublikası Ministrler Keńesiniń Baslıǵı Q.Sariev, Ózbekstan Musılmanları basqarması meshitler bóliminiń baslıǵı R.Raxmanov hám Qaraqalpaqstan Musılmanları qazıyatınıń qazısı Sh.Bawatdinovlar shıǵıp sóylep, qatnasıwshılarǵa áwmet tiledi.
Ilajda Quran insanlardı durıs jolǵa baslawshı, jaqsı niyetlerge, sawaplı ámellerge shaqırıwshı iláhiy kálam ekenligi atap ótilip, usı qayırlı hám sawaplı is aldınan Quran oqılıp, jaqsı niyet, duwalar qılındı.
Ilaj kóterińki ruwxta hám shólkemleskenlikpenen baslandı.
Jarısta 18-25 jastaǵı qatnasıwshılar arasında Nurmuhammed Ametniyazov birinshi, Shamsaddin Nuriddinov ekinshi, Islom Ismailov úshinshi orındı, 26-40 jas arasındaǵı qatnasıwshılardan Sultanbay Rajapov birinshi, Zulfiqar Sapashev ekinshi, Nazarjan Abidjanov úshinshi orındı iyeledi.
Muhammad ibn Axmad al-Beruniy orta arnawlı islam bilim jurtı talabalarınıń qatnasında Hifz baǵdarı boyınsha Ubaydulla Xabibullaev birinshi, Nematulla Qurbanbaev ekinshi, Yaxiyaxuja Juraev úshinshi orındı, al Tilawat baǵdarı boyınsha Hamidulla Hikmatullaev birinshi, Zarafatdin Saǵidullaev ekinshi, Karamatdin Najimatdinov úshinshi orındı iyeledi.
Jeńimpazlar qala hám rayon hákimiyatları, Qaraqalpaqstan Musılmanları qazıyatı, qáwender shólkemler tárepinen tayarlanǵan diplom hám qımbat bahalı sawǵalar menen sıylıqlandı.
Á.Jiyemuratov,
Qaraqalpaqstan xabar agentliginiń xabarshısı