Bıyılǵı jılı respublikamız boyınsha 89 fermer xojalıǵı tárepinen jámi 131 gektar maydanda miyweli baǵ, 342 fermer xojalıǵında 400 gektar maydanda jańadan júzimgershilik payda etiw rejelestirilgen. Sonday-aq, 101 gektar maydandaǵı baǵ hám 53 gektar júzimgershilikte rekonstrukciyalaw jumısları alıp barılıp, olardıń ornına eksportbap miywe jáne júzim nálleri otırǵızıladı. Usı maydanlarǵa 133 mıń dana miyweli nál, 503 mıń dana júzim náli talap etiledi.
Bul haqqında Tashkent mámleketlik agrar universitetiniń Nókis filialında ótkerilgen «Baǵ hám júzimgershilikti rawajlandırıw, jańadan baǵ hám júzimgershilikler payda etiw, eskilerin rekonstrukciyalaw, azıq-awqat ónimlerin kóbeytiw maqsetinde baǵ-júzimgershiliklerdiń aralarında máwsimlik jáne tákirarıy egin sıpatında ovosh, palız, kartoshka hám basqa da eginlerdi jetistiriw, olardı eksportqa jiberiw» temasındaǵı ámeliy seminar-keńeste aytıldı.
Málim bolıwınsha, ótken jılı respublikamızda jámi 80 mıń 658 tonna miywe, 12 mıń tonna júzim jetistirilgen. Bul xalıqtıń jan basına usı ónimler menen támiyinlew 47 procentti quraǵan. «Ózvinosanaat-xolding» xolding kompaniyası járdem menen Nókis rayonında 15 gektar maydanda miyweli baǵ, 5 gektar maydanda jańadan nálxana shólkemlestirilgen.
Ilajda júzimgershilikte alıp barılatuǵın agrotexnikalıq ilajlar, olarǵa aldıńǵı texnologiyalardı engiziw, jańadan miyweli baǵ jáne júzimgershilikti payda etiw, olarda ushırasatuǵın kesellik hám zıyankeslerge qarsı gúresiw, sonday-aq tarawdı bunnan bılay da rawajlandırıwda bank tárepinen ajıratılatuǵın kredit qarjıları, janılǵı-maylaw materialları menen támiyinlew máseleleri sóz etildi.
Seminar qatnasıwshıları «Ifoda», «JOHN DEERE» kompaniyaları, «Chimgan» traktor zavodı, «Qoraqalpoqagrokimyoximoya» aymaqlıq akcionerlik jámiyeti tárepinen júzimgershilikte ushırasatuǵın kesellik hám zıyankeslerge qarsı gúresiwde qollanılatuǵın preparatlar, olardıń qatar araların islewshi túrli markadaǵı traktorlar, kombaynlar, orım-jıyın texnikaları, motocikllar kórgizbesi menen tanıstı.
D.ABIBULLAEV
Qaraqalpaqstan xabar agentliginiń xabarshısı