Ózbekstan Respublikası Ádillik ministrliginde usı jılı 22-fevral kúni dizimge alınǵan «Xalıqtıń bántligin támiyinlew ushın kommerciyalıq bankler tárepinen mikrokreditler ajıratıw tártibi haqqındaǵı reje» talabı tiykarında puqaralarǵa 3 aydan 6 ayǵa shekem jeńilletilgen halda 3 jıldan kóp bolmaǵan múddetke eń kem miynet haqınıń 100 esesi muǵdarına shekem mikrokreditler beriledi.

Bul mikrokreditler birinshi gezekte, aymaqlarda xalqımız ushın múnásip turmıs sharayatların jaratıw, isbilermenlik jumısı arqalı belgili bir miynet túri menen shuǵıllanıw tileginde júrgen puqaralarǵa ajıratıladı.

Mikrokreditler «Mikrokreditbank» tárepinen Ámiwdárya, Ellikqala rayonlarındaǵı, «Qishloq qurilish bank» tárepinen Beruniy rayonındaǵı, «Agrobank» tárepinen Qaraózek, Taxtakópir, Nókis rayonlarındaǵı, «Sanaatqurılısbank» tárepinen Qońırat, Taqıyatas rayonlarındaǵı, «Sawdagerbank» tárepinen Tórtkúl rayonındaǵı, «Milliy bank» tárepinen Xojeli, Shımbay rayonlarındaǵı, «Xalıq banki» tárepinen Moynaq, Shomanay, Qanlıkól rayonlarındaǵı, «Asaka bank» tárepinen Kegeyli rayonındaǵı, «Kapitalbank», «Infinbank», «Aloqabank», «Ipotekabank», «Turanbank», «Hamkorbank» tárepinen Nókis qalasındaǵı isbilermenlik penen shuǵıllanatuǵın shańaraqlarǵa jeńillikli shártler tiykarında ajıratılıwı belgilengen.

Esletip ótemiz, Ózbekstan Respublikası Prezidenti Shavkat Mirziyoev 2017-jıl 15-16-dekabr kúnleri respublikamızǵa saparı waqtında Oraylıq bankke kommerciyalıq bankler menen birgelikte respublikamızda isbilermenlikti rawajlandırıw ushın jeńillikli kreditler beriw kólemin keminde 1,5 esege arttırıw boyınsha tapsırma bergen edi.

– Isbilermenlik penen shuǵıllanıw tilegindegi shańaraqlardı anıqlaw boyınsha komissiya dúzildi. Búgingi kúnge komissiya tárepinen hákimlikler menen birgelikte respublikamız boyınsha isbilermenlik penen shuǵıllanatuǵın shańaraqlar anıqlanıp, olardıń dizimi alındı, -deydi Ózbekstan Respublikası Oraylıq banki Qaraqalpaqstan Respublikası bas basqarmasınıń basqarma baslıǵı Azamat Abdikarimov. – Sonday-aq, Oraylıq banktiń Qaraqalpaqstan Respublikası bas basqarması tárepinen barlıq kommerciyalıq bankler shańaraqlıq isbilermenlerge jeńillikli kreditler ajıratıw boyınsha juwapker etip biriktirildi.

D.ABIBULLAEV,

Qaraqalpaqstan xabar agentliginiń xabarshısı