Ózbekstan Respublikası Prezidentiniń dene tárbiyası hám sport ministrligi jumısların shólkemlestiriw haqqındaǵı qararı qabıl etildi, dep xabar bermekte Ádillik ministrliginiń «Huquqiy axborot» kanalı.
Qarar tiykarında Dene tárbiyası hám sport ministrliginiń shólkemlestiriw strukturası, ministrliktiń oraylıq apparatı hám onıń aymaqlıq bólimleriniń srukturaları, shtat birlikleri sanı tastıyıqlandı.
Ministrler Kabinetine paytaxt aymaǵında «Sport» erkin ekonomikalıq zonasın shólkemlestiriw boyınsha qarar qabıl etiw wazıypası júkletildi.
«Sport» erkin ekonomikalıq zonasında dúnya kóleminde jetekshi bolǵan sport kiyimleri hám inventarların islep shıǵarıwshılar menen birge zamanagóy kárxanalar shólkemlestiriledi.
Sonday-aq, qarar tiykarında 2018-jıl 1-iyunnan baslap dene tárbiyası hám sporttı rawajlandırıw ushın tólemler engizilmekte.
Atap aytqanda, bunnan bılay realizaciyalanǵan 1 dal (10 litr) pivo ushın – 2000 sum, 1 dal (10 litr) araq ushın – 5000 sum, 1000 dana sigareta ushın 1000 sum muǵdarında tólemler tóleniwi kerek.
Bul tólemdi alkogol hám temeki ónimlerin islep shıǵarıwshılar Dene tárbiyası hám sporttı rawajlandırıw qorına tóleydi.
Qaraqalpaqstan xabar agentligi