Ózbekstan Respublikası Prezidentiniń dene tárbiyası hám sport tarawında mámleketlik basqarıw sistemasın túpkilikli jetilistiriw ilajları haqqındaǵı pármanı qabıl etildi, dep xabar bermekte Ádillik ministrliginiń «Huquqiy axborot» kanalı.
Pármanǵa muwapıq:
– Dene tárbiyası hám sport mámleketlik komiteti hám onıń aymaqlardaǵı bólimleri negizinde Dene tárbiyası hám sport ministrligi;
– Ózbekstan mámleketlik dene tárbiyası institutı tiykarında Ózbekstan mámleketlik dene tárbiyası hám sport universiteti shólkemlestirildi.
Dene tárbiyası hám sport tarawı xızmetkerleri hám basqa shaxslardı xoshametlew maqsetinde «Ózbekstan Respublikasına xızmet kórsetken dene tárbiyası xızmetkeri» húrmetli ataǵı shólkemlestirilmekte.
Párman tiykarında ǵalabalıq sporttı rawajlandırıw hám qábiletli jaslardı saylap alıw (selekciya) tarawında bilimlendiriw mákemeleriniń baslı baǵdarları etip belgilep berildi.
Pármanda ministrliktiń olimpiya sport túrlerin rawajlandırıwǵa juwapker bólimleri basshılıǵına talabanlar Ózbekstan Milliy olimpiya komiteti baslıǵı menen májbúriy túrde kelisiwi belgilengen.
Bunnan bılay dene tárbiyası hám sport shólkemleri, sonday-aq, bilimlendiriw mákemeleri menen sport shólkemlerinde miynet etip atırǵan sport nuranıylarına miynettiń basqa haqı tólenetuǵın túrleri menen shuǵıllanbaw shárti menen pensiya tolıq muǵdarda tólenedi.
Mámleketlik bilimlendiriw mákemeleriniń dene tárbiyası oqıtıwshısı (instruktorı) lawazımına tayınlaw hám lawazımınan azat etiw ministrlik penen kelisilgen halda Qaraqalpaqstan Respublikası dene tárbiyası hám sport ministri, wálayatlar jáne Tashkent qalalıq dene tárbiyası jáne sport basqarması baslıqları tárepinen ámelge asırılıwı belgilep berildi.
Qaraqalpaqstan xabar agentligi