Paytaxtımızdaǵı 1-sanlı kóp tarmaqlı balalar hám jas óspirimler sport mektebinde «Salamat shańaraq» súreni astında shańaraqlıq jarıs bolıp ótti.

Ilajdıń ashılıw saltanatında Qaraqalpaqstan kásiplik awqamları shólkemleri birlespesi Keńesiniń baslıǵı U.Jálmenov hám basqalar shıǵıp sóylep, jarıstıń maqset hám wazıypalarına toqtap ótti.

Atap ótilgenindey, jarıstı ótkeriwdegi tiykarǵı maqset kárxana, shólkem hám mákemelerde islewshi xızmetkerler hám olardıń shańaraq aǵzaları arasında salamat turmıs tárizin qáliplestiriw, olar arasında ǵalabalıq sport túrlerin keńnen úgit-násiyatlaw arqalı túrli kásip keselliklerinen qorǵaw, dene tárbiyası hám sport penen turaqlı shuǵıllanıwdı olardıń kúndelikli turmıs tárizine aylandırıwdan ibarat bolıp tabıladı. Qalalıq hám rayonlıq basqıshlarda jeńimpaz bolǵan komandalar badminton, shaxmat-shashka túrleri, sonday-aq, «Shaqqanlıq hám mergenlik», «Sheber hújimshi», «Tezlik», arqan tartısıw, «Epshillik», «Bir komanda» estafeta basqıshları boyınsha óz ara kúsh sınastı.

-Bunday jarıslardıń ótkeriliwi shańaraqlar arasında sporttı úgit-násiyatlawda ayrıqsha áhmiyetke iye,-deydi Shımbay rayonlıq medicina birlespesine qaraslı 53-sanlı «Qızılózek» awıllıq shańaraq poliklinikasınıń patronaj hámshiyrası Gúlbáhár Tájimova.-Rayonlıq irrigaciya tarmaǵında islewshi ómirlik joldasım Polat Ibragimov, balam, rayondaǵı 3-sanlı ulıwma bilim beriw mektebiniń 4-klass oqıwshısı Sherzod Qurbanbaev penen birgelikte qatnasıp atırmız.

Jarıs juwmaǵında 8-12 jasqa shekemgi er balası menen qatnasqan komandalar arasında birinshi orındı Xojeli rayonınan Kenjebaevlar shańaraǵı, ekinshi orındı Shomanay rayonınan Ametovlar shańaraǵı, úshinshi orındı Qaraózek rayonınan Tájimuratovlar shańaraǵı, 8-12 jasqa shekemgi qızı menen qatnasqan komandalar arasında birinshi orındı Taxtakópir rayonınan Serimbetovlar shańaraǵı, ekinshi orındı Shomanay rayonınan Aytbaevlar shańaraǵı, úshinshi orındı Xojeli rayonınan Purxanovlar shańaraǵı iyelegen bolsa, ulıwma komandalıq esapta Xojeli rayonınıń sporshılar shańaraǵı birinshi, Shomanay rayonı ekinshi, Taxtakópir rayonı úshinshi orınlardı qolǵa kirgizdi. Sonday-aq, «Eń shaqqan shańaraq», «Jeńiske bolǵan umtılısı joqarı shańaraq», «Belsene qatnasqan shańaraq» nominaciyaları boyınsha jeńimpazlar anıqlandı.

Jeńimpazlarǵa hám belsene qatnasqan shańaraqlarǵa Qaraqalpaqstan kásiplik awqamları shólkemleri birlespesi Keńesi tárepinen Diplom jáne bahalı sawǵalar tapsırıldı.

D.ABIBULLAEV

Qaraqalpaqstan xabar agentliginiń xabarshısı