2018-jıl 2-mart kúni saat 3.30lar shamasında A-380 avtojolınıń 900-901 km aralıǵında Elabad poselkası tárepten kiyatırǵan «Lada largus» markalı avtomashina jolda gazi tawsılıp toqtap turǵan «Kamaz» markalı júk transportınıń artqı tirkemesine kelip urılıp, aqıbetinde awır jol-transport hádiysesi júz bergen.
«Lada largus» avtomashinasındaǵı 3 puqara hádiyse júz bergen orında qaytıs bolǵan.
Agentlikke málim bolıwınsha, qaytıs bolǵan puqaralar Nókis rayonı turǵınları bolǵan.
Qaraqalpaqstan Respublikası jol háreketi qáwipsizligi basqarmasınıń maǵlıwmatına kóre, usı jıldıń basınan berli Qaraqalpaqstan boyınsha 46 awır jol-transport hádiysesi júz berip, 22 adam usınday baxıtsız hádiyseler qurbanı bolǵan, 45 adam hár túrli dene jaraqatların alǵan.
Esletip ótemiz, usı jıldıń 1-martınan 1-apreline shekem Respublikamızda «Háreket qáwipsizligi aylıǵı» ótkeriledi.
Qaraqalpaqstan Respublikası jol háreketi qáwipsizligi basqarması respublikamızdıń bárshe xalqın «Háreket qáwipsizligi aylıǵı»na belsene qatnasıwǵa mirát etedi
Qaraqalpaqstan xabar agentligi