Úlkemizge báhár máwsimi kirip keliwi menen átirapta ájayıp ózgerisler júz beredi. Báhárdiń dáslepki kúnlerinen baslap-aq bayramlar baslanadı. Bul bayramlar insandı ayrıqsha quwanıshqa bóleydi.

Biziń mektebimizde de báhár Ózbekstan xalıq shayırı Zulfiya Isroilovanıń ómir jolına hám dóretiwshiligine baǵıshlanǵan «Qızıń gózzal bolsın, shayır bolsın…» atamasında bayram keshesi menen baslandı.

Bayram keshesinde mektep direktorı S.Utambetova, direktordıń ruwxıylıq hám aǵartıwshılıq isleri boyınsha orınbasarı S.Zarımbetova hám basqalar Zulfiya Isroilovanıń tek ǵana ózbek ádebiyatında emes, al shıǵıs ádebiyatı hám filosofiyasında da tutqan ornı ayrıqsha ekenligin, onıń qosıqları joqarı insanıylıq sezimler menen suwǵarılǵanın hám bul tárepler sadıqlıq jáne opadarlıq tımsalı sıpatında bárshe hayal-qızlar ushın úlgi bolatuǵının atap ótti.

Ilaj sheńberinde mektebimizdiń belsendi bes qızı bes basqısh boyınsha jarıstı. Olar sálemnama, Zulfiyaxanım qosıqları, óz ónerin kórsetiw, saxnalıq kórinis hám soraw-juwap basqıshlarında bellesti.

Bellesiw dawamında mektebimizdiń 10-klass oqıwshısı Husnida Ikramova birinshi orınǵa miyasar boldı.

Jarısta qatnasıwshı qızlarǵa mektebimiz jámááti tárepinen sawǵalar berildi.

Gulbahar PALWANIYaZOVA,

Nókis qalası 3-sanlı mekteptiń

qaraqalpaq tili hám ádebiyatı páni oqıtıwshısı.