Toshkentdagi “Humo Arena” muz saroyining kichik majmuasida tashkil etilgan xokkey bo‘yicha Qozog‘iston yoshlar chempionatining navbatdagi turida “Tashkent Select” jamoasi Qozog‘istonning “Astana” yoshlar jamoasi bilan ro‘baro‘ keldi.
Shiddatli kechgan bahsda ostonalik yosh xokkeychilar 9:5 hisobida zafar quchdi.
Toshkentliklar safida Ilya Popov, Albert Dadaxo‘jayev, Abduqayum Abduvosiqov, Aziz Muhammedbayev va Ilsur Umerov gollarga mualliflik qildi.
Bugun, 16 noyabr kuni “Humo Arena” muz saroyining kichik majmuasida jamoalar o‘rtasidagi ikkinchi o‘yin bo‘lib o‘tadi.
Eslatib o‘tamiz, Qozog‘iston yoshlar chempionatida ishtirok etayotgan “Tashkent Select” jamoasi ayni damda 6 ochko bilan turnir jadvalida 12-o‘rinni, “Astana” esa 17 ochko bilan 9-o‘rinni egallab turibdi.
T.Ro‘ziyev, O‘zA