Joriy yilning 22-24 avgust kunlari Boshqirdiston Respublikasida II xalqaro “Kuz romantikasi” klassik musiqa festivali bo‘lib o‘tdi.

Tadbirda Qoraqalpog‘iston delegatsiyasi a’zolarining Boshqirdiston Respublikasi davlat akademik simfonik orkestri bilan hamkorlikda milliy madaniyatimiz namunalari jamlangan konsert dasturi namoyish etildi.

Festivalda Qoraqalpog‘istondan tashrif buyurgan bir guruh san’atkorlar Boshqirdiston Respublikasining yuksak unvonlari bilan taqdirlandi. Jumladan, Qoraqalpog‘iston Respublikasida xizmat ko‘rsatgan artist Begis Temirbayev “Boshqirdiston Respublikasi xalq artisti”, Alisher Navoiy nomidagi O‘zbekiston davlat akademik katta teatri solisti O‘temis Jumaniyazov, yosh ijodkorlar Mamanbiy Jumabayev hamda Xursandbek Atamuratov “Boshqirdiston Respublikasida xizmat ko‘rsatgan artist” faxriy unvonlariga sazovor bo‘ldi. O‘zbekiston, Qoraqalpog‘iston, Tatariston hamda Boshqirdiston xalq artisti Jenisbek Piyazovga Boshqirdiston Respublikasi hukumatining Faxriy yorlig‘i topshirildi.

Ko‘rsatilgan bu e’tirof qoraqalpoq va boshqird xalqlarining mustahkam do‘stligining yorqin ifodasi bo‘lib, Qoraqalpog‘iston hamda Boshqirdiston Respublikalari o‘rtasida ijtimoiy-iqtisodiy, savdo va madaniy-gumanitar sohalaridagi hamkorlikning ijobiy samarasidir.

Dovud Abibullayev, O‘zA muxbiri.