Jahonga mashhur xonanda Tina Terner 83 yoshda vafot etdi.

Deadline nashrining yozishicha, xonanda uzoq davom etgan xastalikdan so‘ng Syurixdan uncha uzoq bo‘lmagan Kyusnaxt shahrida o‘zining uyida hayotdan ko‘z yumgan.

1939 yil 26 noyabrda AQSHning Tennessi shtatida dunyoga kelgan Tina Terner  qo‘shiqchilik faoliyati davomida sakkiz marotaba “Gremmi” mukofotiga sazovar bo‘lgan. Rolling Stone jurnali uni zamonamizning eng buyuk xonandalaridan biri, deb yozgan. 2021 yilda xonanda  Rok-n-roll shon-sharaflar zaliga qabul qilingan. Uning “Proud Mary” (1970), “Let’s Stay Together” (1984), “Private Dancer” (1984), “What’s Love Got to Do with It” (1984), “The Best”(1989) kabi bir qator kompozitsiyalari dunyo musiqa ixlosmandlari uchun yaxshi tanish.